Është plot 82 vjeç dhe duket ende shumë në formë. Po ta pyesësh se cili është suksesi i gjithë kësaj energjie, Sali Shijaku na thotë se të gjithë energjinë ia jep arti. Edhe pse 92 vepra të këtij artisti të njohur janë pjesë e fondit të Galerisë Kombëtare, kjo është hera e parë që e shihni Shijakun të prezantojë një ekpozitë.
Artisti i njohur Sali Shijaku është rikthyer me një ekspozitë personale në Galerinë Kombëtare të Arteve. Kjo ekspozitë është ekspozita e parë vetjake e Shijakut në Galerinë Kombëtare të Arteve pas viteve ’90.
Ajo do t’i prezantojë publikut shqiptar dhe atij të huaj krijimtarinë e Sali Shijakut, përmes 65 veprash nga më përfaqësueset, në teknikën e vajit dhe mikse.
Pikturat e sjella në këtë ekspozitë i takojnë koleksionit të tij në GKA dhe studios së piktorit. Ekspozita do të shoqërohet edhe nga katalogu, në të cilin përfshihet ecuria e zhvillimit të pikturës së tij që nis në vitet ’50-të dhe është ende e gjallë dhe natyrale në ditët e sotme.
Piktura e Sali Shijakut vjen e prezantohet në këtë ekspozitë në dy periudha, në dy qëndrime dhe në dy interpretime ndaj botës pamore.
Ekspozita do të qëndrojë e çelur deri më 28 qershor.
