Nga Artur Ajazi
Gjithë historia e Partisë Demokratike përmblidhet në tre fjalë “Sali, Berishë, Sali”. Asgjë nuk lartësohet në atë parti, veç emrit të kryetarit të përjetshëm. Askush nuk ka gjë me PD, madje as Edi Rama. Kjo pasi në politikë, gjërat janë të ndara, dikush humb dhe dikush fiton. Por të kërkosh përjetësimin edhe kur ke humbur dhjetra zgjedhje përballë kundershtarit historik, të përjetësosh hijen dhe emrin tend në parti, edhe kur e sheh se si po katandiset ajo, të mbetesh pedant edhe kur shqiptarët e thonë troç me vote, “Edi stay, Sali go”, kjo është alarmante nga vështrimi politik. Shko dhe rrotollohu andej nga ishe.
E bëri një “foltore” dhe tash ka nisur një tjetër “foltore”, edhe pse në bulevard dolën rreth 150 vetë. Berisha e quajti “foltoren 1 “ si të “ribashkimit të demokrateve pas përçarjes nga Basha”, dhe tash ka nisur “foltoren 2”, duke deklaruar se “kjo është e fitores”. E fitores mbi cilin, e fitores ndaj kujt ? Pasi në 11 Maj humbi sërish PD e Saliut, jo PD e demokrateve. Atehere mund të themi se, kjo gjë vjen natyrshëm si pasojë e keqmenaxhimit nga lidershipi asaj partie. Vetëm një i marrë, nuk e kupton se, gjithçka ka një kufi, ka një fillim dhe një mbarim. Vetëm Zoti është i përjetshëm. Madje as Enver Hoxha nuk u bë i përjetshëm.
Të mbetesh stoik në politikë, do të thotë se ke zgjedhur rrugën e gabuar për karrierën tënde. Shqipëria aktualisht gjendet në një fazë shumë intensive zhvillimore, si nga pikëpamja ekonomike, politike dhe integruese. Eshtë marrëzi të merresh me politikën e rrugëve, që nuk të ofron asgjë, dhe të mendosh se “foltoret e një partie humbëse, do ti sjellin shqiptareve zhvillim, integrim, mirëqenie”. Kush punon gabon, kush gabon ndëshkohet. E keqja është kur ti gabon, dhe mbron fajtorin. Kjo ka ndodhur dikur, kur Berisha kishte pushtetin e parë 1992 deri 1997, dhe të dytë nga 2005 deri 2013. Por sot, kjo gjë nuk ndodh, dhe e dini pse ? Sepse Edi Rama, erdhi në pushtet, me mëndje tjetër, dhe jo për të kënetëzuar qytetet dhe fshatrat. Dhe kjo është reale, e faktuar, dhe nuk ka nevojë fare për propogandë mediatike.
Mjafton të ndiqni, ç’thonë ata që vijnë në Shqipëri për herë të parë, ose pas 10-15 vitesh, për tu bindur se Edi Rama e kishte seriozisht kur deklaroi në 2013 se “këtë vend do ta bëjmë vetëm ne socialistet”. Ishte momenti i duhur për Edi Ramën, pasi koha nuk priste. E mori pocaqi, dhe sot e ka kthyer në vendin e lakmueshëm për çdo të huaj. Mbi 22 mijë italianë kanë zgjedhur të jetojnë në Shqipëri, mbi 12 mijë të tjerë pensionistë, banojnë në Shqipëri, duke u pasaportizuar në qytetet kryesore të vendit.
Ky natyrisht mbetet tregues i mirëqenies, zhvillimit dhe integrimit europian, dhe sfidon propogandën e pafuqishme të PD. Kur nuk të duan, shqiptarët të largojnë me vote, ama kur të duan të mbajnë gjatë, sërish me vote.
