Liverpool ka fituar me përmbysje në fushën e Crystal Palace, në ndeshjen që hapi javën e 32-të të kampionatit anglez. Të kuqtë, edhe pse pësuan gol, në fund fituan 2-1. Kur u mbushën 13 minuta lojë, Crystal Palace kaloi në avantazh me penalltinë e kthyer në gol nga Luka Milivojevic. Barazimi i miqve erdhi sapo nisi pjesa e dytë me golin e shënuar nga Saido Mane.
Ky ishte goli 43-të për Mane në Premier League, duke barazuar rekordin e futbollistëve nga Senegali në këtë kampionat, që mbahet nga Demba Ba. Gjashtë minuta para fundit, “i zakonshmi” Mohamed Salah, realizoi golin e fitores për “të kuqtë”, duke u gjendur në vendin e duhur në momentin e duhur duke “firmosur” golin e 29-të në këtë kampionat, ku është golashënuesi më i mirë.
Ai barazoi rekordin e Drogba, si lojtari afrikan që kishte shënuar më shumë në harkun e një sezoni në Angli. Kjo fitore e ngjit ekipin e Jurgen Klopp në vendin e dytë me një pikë më shumë se Manchester United i vendit të tretë.
a.ç
