Dy shtetas ukrainas, të cilët dyshohet se punonin për shërbimet ruse, janë identifikuar si të përfshirë në shpërthimin e ndodhur në një linjë hekurudhore në Poloni. Lajmi u konfirmua nga kryeministri polak, Donald Tusk.
Sipas autoriteteve polake, urdhri për të kryer aktin dyshohet të ketë ardhur nga inteligjenca ruse. Ngjarja ndodhi gjatë fundjavës dhe u përshkrua nga Tusk si “një akt sabotimi pa precedent”.
Linja hekurudhore, e cila përdorej për transportimin e ndihmave drejt Ukrainës, u dëmtua në dy pika. Një zëdhënës i qeverisë deklaroi se sabotimi përbënte një rrezik të menjëhershëm për trafikun tokësor dhe vuri në rrezik jetë njerëzish dhe pasuri.
Prokurorët polakë kanë hapur një hetim zyrtar mbi ngjarjen, ndërsa njësi të ushtrisë janë vendosur në terren për të garantuar sigurinë e infrastrukturës.
Polonia, si anëtare e NATO-s dhe BE-së, ka një rrjet hekurudhor të rëndësishëm për transportin e ndihmave drejt Ukrainës që prej fillimit të pushtimit rus në shkurt të vitit 2022. Në shtator, Tusk deklaroi se tre dronë rusë ishin rrëzuar nga avionë polakë dhe të NATO-s në hapësirën ajrore të Polonisë gjatë sulmeve ndaj Ukrainës.
Ai tha se ishin regjistruar 19 shkelje me dronë, disa prej të cilave kishin fluturuar aq thellë sa kishin detyruar mbylljen e përkohshme të katër aeroporteve, përfshirë aeroportin kryesor të Varshavës, Chopin. Ministria ruse e mbrojtjes reagoi duke thënë se “nuk kishte plane” për të goditur objekte në territorin polak.
