Nga Andi Malasi
Në media po qarkullon një video sa skandaloze, po aq qesharake. Ministri i Brendshëm teknik shfaqet në terren duke ndërhyrë në punën e oficerëve të Policisë Gjyqësore të cilët i urdhëron se çfarë duhet të sekuestrojnë në një rrethim të quajtur ‘vendngjarje’ dhe çfarë jo. Ai është filmuar teksa urdhëron oficerët të kthejnë pas prozhektorët e bllokuar pas mitingut të PD, të cilët dyshohet se shkaktuan helmimin e mbi 140 simpatizantëve të opozitës dhe vet liderit të selisë blu Basha.
Teksa oficerët bllokuan 11 prozhektorët të cilët do t’i nënshtrohen ekspertizës, ministri Demiraj urdhëron policët t’i kthejnë pas dhe të marrin vetëm një prej tyre në ndihmë të hetimeve. As më shumë e as më pak, ai urdhëron oficerët se çfarë duhet të marrin dhe çfarë jo si provë materiale në vendngjarje.
Nuk dua t’i hyj fare nëse oficerët e Policisë Gjyqësore kanë vepruar drejt apo kanë gabuar me mbledhjen dhe administrimin e provave në vendngjarje, kjo është çështje që kërkon ekspertë të mirëfilltë apo hetues, por kur një ministër ndërhyn në terren kjo, minimalja është tejkalim i kompetencave dhe akoma më keq pengim i hetimeve.
Si mundet të kalojë shiritin i rrethimit të vendngjarjes një person edhe me tagrin e minisitrit qoftë ai, dhe të urdhërojë hetuesit se çfarë duhet dhe çfarë nuk duhet të sekuestrojnë në vendngjarje? Vetë kalimi i shiritit nga persona të paautorizuar rrezikon seriozisht prishjen e provave në vendngjarje. Përveçse një skandal, ky veprim i ministrit është një gafë shumë e rëndë që edhe pse jo në polici, me eksperiencën dhe specializimet në ushtri ky ministër nuk duhet ta konsumonte. Të jesh ministër teknik nuk do të thotë të zbresësh në terren dhe të japësh urdhra në kuadër të hetimit të çështjeve.
Kjo video më kujtoi një episod të disa viteve më parë kur ministër ishte Flamur Noka. Kujtoj që një koleg gazetar e pyet Nokën për një çështje sensitive policore që ishte kthyer në politike, dhe ai jo pa ironi përgjigjet: “Të dukem gjë si drejtor policie?” Në fakt dikush nga gazetarët e mori për arrogancë përgjigjen dhe dikush si batutë, por në përgjithësi edhe pse të pakënaqur me përgjigjen që ishte një taktikë për t’iu shmangur pyetjes (kur dihet se drejtorin e policisë e kishte vartës) në fakt ministri i atëhershëm dha një përgjigje korrekte. Nuk mund të përgjigjej për çështje policore. (Pavarësisht se ne të mësuar me praktikat shqiptare ishim të bindur se drejtori vepronte sipas urdhrave të ministrit).
E solla si rast, pasi në atë episod, edhe pse ne si gazetarë me informacionet tona kishim bindje për ndërhyrjen e ministrit, të paktën ai ishte mjaft i kujdesshëm dhe të paktën ligjërisht ishte në rregull. Të jesh ministër nuk do të thotë se je fuqiplotë ndaj punëve të policisë. Në rastin kur ministri urdhëron oficerët se çfarë duhet të sekuestrojnë në vendngjarje, kjo është shumë më e rëndë se thjesht tejkalim kompetencash.
Dhe për ta mbyllur, po nëse rezulton që helmimi i mbi 140 personave ka ardhur vërtetë nga prozhektorët që ministri urdhëron t’i kthehen firmës për t’i përdorur në aktivitetin elektoral të radhës…? Kush do mbante përgjegjësi në këtë rast nëse të tjerë persona do të lëndoheshin…?!
