Mallrat e akcizës në vendin tonë do të kushtojnë më shtrenjtë për shkak të planifikimit të qeverisë për ta rishikuar këtë taksë.
Por sa është akciza që paguhet aktualisht mbi këto produkte, e cila rrjedhimisht shkarkohet në çmimin final për konsumatorët?
Për pijet alkoolike me përqindje alkooli 38%, detyrimi i akcizës llogaritet në rreth 336.6 lekë / litër.
Sa i takon produktit verë, nëse një verë është me përqindje alkolike 12,5% ose me pak, përllogaritja e detyrimit të akcizës bëhet në bazë të prodhimit.
Në rastin e prodhuesit nën 10000 HL në vit , akciza llogaritet 31.4 lekë / litër; dhe në rastin e prodhuesit mbi 10000 HL në vit, detyrimi i akcizës është 104.8 lekë / litër.
Nëse një verë është me përqindje alkolike mbi 12,5%, detyrimi i akcizës kapërcen në 41.9 lekë / litër për prodhuesit nën 10000 HL dhe 125.8 lekë / litër për prodhuesit mbi 10000 HL në vit. Sa i takon këtij produkti, qeveria parashikon unifikim i akcizës, duke hequr kriterin e sasisë së prodhimit.
Si përllogaritet detyrimi i akcizës në rastin e produktit birrë? Nëse birra është me përqindje alkoolike 4.2, përllogaritja e detyrimit të akcizës shkon në 31.2 lekë / litër. Sa i takon produktit raki, nëse ajo me përqindje alkoolike 40%, përllogaritja e detyrimit të akcizës do të jetë 83.8 lekë / litër. Në rastin e pijeve alkoolike të ndërmjetme me një forcë alkoolike mbi 15% volum por që nuk e kalon 22% volum akciza është 54.5 lekë / litër.
Lidhur me produktin kafe, detyrimi i akcizës në rastin e kafes së papjekur është 0 lekë/kg dhe në rastin e kafes së pjekur akciza është 62.9 lekë / kg. Për cigaret akciza është është 7500 lekë / 1000 fije.
Detyrimi i akcizës në rastin e gazrave të naftës dhe hidrokarburet e tjera gazoike që përdoren si lëndë djegëse për motora automjetesh është në nivelin e 6.3 lekë/litër.
