Rusia thotë ka marrë nën kontrollon qytetin e Izyum, i cili ndodhet në rajonin e Kharkiv në Ukrainën lindore, raporton kanali shtetëror rus i lajmeve Rossiya 24.
“Forcat e armatosura ruse vazhdojnë të kryejnë misione të operacionit special ushtarak. Mëngjesin e 24 Marsit, njësitë e ushtrisë ruse kanë marrë kontrollin e plotë të qytetit të Izyum në rajonin e Kharkiv”, tha zëdhënësi i Ministrisë ruse të Mbrojtjes, Igor Konashenkov.
Megjithatë, nga ana e saj, administrata ukrainase e qytetit thotë se luftimet vazhdojnë.
Në fillim të kësaj jave, një zyrtar i lartë i Pentagonit, tha se ushtria ukrainase kishte nisur një kundërsulm në qytetin e vogël në juglindje të Kharkiv.
“Ajo që ne po shohim sot janë disa luftime të rëndësishme nga ukrainasit dhe një përpjekje për ta rimarrë qytetin”, citohet zyrtari nga agjencia e lajmeve AFP.
Izyum është në një rrugë kyçe për në rajonin lindor të Donbasit që potencialisht do të lejonte forcat ruse të lidhen në verilindje dhe juglindje. Është një qendër rajonale në rajonin e Kharkiv me një popullsi prej rreth 50,000 banorësh dhe një kryqëzim i rëndësishëm hekurudhor.
/a.r
