Rusia kritikoi vendet dhe mediat perëndimore për përhapjen e një “fushate dezinformimi në shkallë të gjerë” mbi një pushtim të mundshëm rus të Ukrainës , duke thënë të premten se po e bënin këtë për të larguar vëmendjen nga veprimet e tyre agresive.
Deklarata e Ministrisë së Jashtme ruse vjen vetëm disa orë përpara një telefonate midis presidentit amerikan Joe Biden dhe presidentit rus Vladimir Putin të shtunën, dhe ndërsa SHBA lëshoi një paralajmërim të ashpër se një sulm rus ndaj Ukrainës ishte i pashmangshëm, shkruan CNN, përcjell abcnews.al.
“Në fund të vitit 2021 dhe në fillim të vitit 2022, hapësira globale e informacionit u përball me një fushatë mediatike të paprecedentë në shkallën dhe sofistikimin e saj, qëllimi i së cilës është të bindë komunitetin botëror se Federata Ruse po përgatit një pushtim të territorit të Ukrainës ”, tha Ministria e Jashtme ruse në një deklaratë në orët e vona të së premtes.
Këshilltari amerikan për sigurinë kombëtare, Jake Sullivan, paralajmëroi të premten se një sulm rus ndaj Ukrainës mund të fillojë së shpejti, duke përfshirë bomba dhe raketa. Sullivan këshilloi të gjithë amerikanët që të largohen nga vendi sa më shpejt që të jetë e mundur për sigurinë e tyre, duke i bërë jehonë thirrjes së një numri në rritje të ambasadave që po bëjnë të njëjtën gjë.
Ndërsa Sullivan tha se nuk është e qartë nëse Putini ka vendosur të pushtojë Ukrainën, ai tha se ekzistonte një “mundësi shumë e dallueshme” që Rusia të vepronte ushtarakisht.
Kremlini ka mohuar prej kohësh se po planifikon të sulmojë dhe ka argumentuar se mbështetja e NATO-s për Ukrainën, duke përfshirë rritjen e furnizimeve me armë dhe trajnimin ushtarak, përbën një kërcënim në rritje në krahun perëndimor të Rusisë.
Më herët të premten, Sekretari amerikan i Shtetit, Antony Blinken tha se SHBA-ja vazhdon “të shohë shenja shumë shqetësuese të përshkallëzimit rus, duke përfshirë forcat e reja që mbërrijnë në kufirin ukrainas”.
SHBA vlerëson se Rusia ka më shumë se 100,000 trupa pranë kufirit me Ukrainën, me mijëra të shtuar vetëm këtë javë, sipas një zyrtari të administratës.
g.kosovari
