Ushtria ruse është në prag të marrjes së qytetit jugor të Ukrainës, Mariupol strategjikisht i rëndësishëm për përpjekjet e Rusisë për të ndërtuar një korridor jugor deri në Krime.
Justin Crump, shefi ekzekutiv i konsulencës së inteligjencës Sibylline, është shprehur se situata në qytet është një tragjedi e kobshme humanitare të cilat nuk janë parë që nga Lufta e Dytë Botërore.
Sipas tij luftimet do të vijojnë për një kohë të gjatë veçanërisht në parkun industrial Azovstal pasi ka shumë bunkerë të epokës sovjetike. “Reuters” raporton se forcat ruse tanimë janë dislokuar tani në juglindje.
Megjithatë, rezistenca e ushtrisë ukrainase për këtë qytet vijon të jetë e ashpër. Rusët konfirmuan fundosjen e plotë të anijes flamur të flotë së Detit të Zi “Moskva” në zonën detare mes Odesës dhe Krimesë, për shkak të shpërthimit në depon e municioneve, por pa dhënë detaje.
Bombardime të rënda kanë ndodhur përgjatë pjesës më të madhe të vijës së frontit në rajonin e Donetskut. Qyteti është dëmtuar shumë, me gati 100 shtëpi të shkatërruara dhe mbi 350 njerëz janë zhvendosur. Rusia ka goditur gjithashtu edhe një fabrikë në periferi të Kievit.
Sekretari i Shtetit Antony Blinken ka deklaruar se Shtetet e Bashkuara besojnë se lufta ruse në Ukrainë mund të zgjasë deri në fund të vitit 2022. Zyrtarët europianë janë shprehur për mediat se ky agresion nuk ka një afat pasi nuk ka indikacione se qëllimet përfundimtare të presidentit rus Vladimir Putin kanë ndryshuar.
/b.h
