Rusia gjuajti më shumë se 100 raketa në Ukrainë të enjten në mëngjes, duke synuar kryeqytetin Kiev ku u plagosën tre persona, raporton noa.al duke cituar Reuters.
Edhe në qytetin verilindor Kharkiv, si dhe qytete të tjera pati një bombardim ajror në shkallë të gjerë, thanë autoritetet.
Forcat Ajrore të Ukrainës thanë se sulmet kishin përfshirë raketa me bazë në det dhe ajër të gjuajtura “nga drejtime të ndryshme” dhe pasuan një sulm gjatë natës nga dronët “kamikazë”.
Këshilltari presidencial Mykhailo Podolyak tha se numri i raketave të lëshuara ishte më shumë se 120.
Sirenat e sulmit ajror ranë në të gjithë Ukrainën.
Blitz-i i fundit erdhi pas refuzimit nga ana e Kremlinit të një plani paqeje ukrainas, duke këmbëngulur se Kievi duhet të pranojë aneksimin e katër rajoneve të Ukrainës nga Rusia.
“Dy shtëpi private në lagjen Darnytskyi u dëmtuan nga fragmentet e raketave të rrëzuara,” tha administrata ushtarake e qytetit të Kievit në Telegram.
Po ashtu një biznes dhe një kënd lojërash u dëmtuan dhe situata e viktimave “po sqarohet”.
Kryetari i bashkisë së Kiev, Vitali Klitschko, tha se 16 raketa u hodhën mbi kryeqytet.
Kryetari i bashkisë së Kharkiv, Ihor Terekhov tha se zyrtarët po sqaronin se çfarë ishte goditur dhe nëse kishte viktima pasi raketat ruse shkaktuan një seri shpërthimesh.
Kryetari i bashkisë së Lviv, Andriy Sadovyi, tha në Telegram se 90% e qytetit të tij në Ukrainën perëndimore ishte pa energji elektrike dhe se transporti publik me energji elektrike nuk funksionon.
Rusia pushtoi Ukrainën më 24 shkurt në atë që presidenti Vladimir Putin e quan një “operacion special ushtarak” për çmilitarizimin e fqinjit të saj.
Kievi dhe aleatët e tij perëndimorë i kanë denoncuar veprimet e Rusisë si një rrëmbim toke të stilit imperialist.
/a.r
