Komiteti Ekzekutiv i Unionit Europian të Federatave të Futbollit (UEFA) vendosi sot ngritjen e një komisioni special për të zgjidhur çështjen e pjesëmarrjes së Kosovës dhe Gjibraltarit në kualifikueset e Botërorit “Rusi 2018”.
Lajmi u bë i ditur nga zëvendës-presidenti i UEFA-s, Hryhoriy Surkis, për agjencinë ruse të lajmeve TASS, pas mbledhjes së zhvilluar sot lidhur me vendimin për pjesëmarrjen e Kosovës dhe Gjibraltarit në kualifikimet për Kampionatin Evropian.
Sipas Surkis, vendimi është shtyrë dhe është krijuar një komision special që do të vendosë për këtë çështje.
“Vendimi për pjesëmarrjen e Kosovës dhe përfshirja e Gjibraltarit në kualifikimet për Botëror nuk është marrë. Është krijuar një komision special, i cili do të vendosë për këtë temë”, u shpreh Surkis.
Ishte paralajmëruar se UEFA sot do të marrë vendimin për këtë çështje, Kosova pritet të jetë në Grupin H ose I. Në grupin H janë: Belgjika, Bosnja e Hercegovina, Greqia, Estonia dhe Qipro, kurse, në grupin I janë: Kroacia, Islanda, Ukraina, Turqia dhe Finlanda.
Federatat e Futbollit të Kosovës dhe Gjibraltarit fituan të drejtën e anëtarësimit me të drejta të plota në FIFA javën e kaluar, gjatë Kongresit të zhvilluar në Meksiko Siti të Meksikës.
(javanews.al / r.a)
