Drejtori i Bayern-it, Karl-Heinz Rummenigge ka bërë të ditur se e di ku do të vazhdojë karrierën Pep Guardiola pasi të largohet nga klubi gjerman në fund të sezonit. Të dielën, Rummenigge konfirmoi se Guardiola do të largohet nga Bayerni kur të përfundojë kontrata e tij në fund të sezonit dhe do të zëvendësohet nga Carlo Ancelotti.
44-vjeçari besohet se mund të kalojë në Premier Ligë te Manchester City, ose te dy klubet tjera Manchester United e Chelsea. “Mendoj se e di ku do të shkojë”, ka thënë Rummenigge për “Bild”.
“Por dua t’ia lë në dorë atij njoftimin ose klubit të ri. Në ndejën e Krishtlindjeve para dy jave ai erdhi te unë, më tha se po shikonte sfidë të re dhe thuajse më kërkoi falje. Ishte shumë e vështirë për të, nuk jam i zhgënjyer nga ai”.
