Rudi Vata është i bindur se trajneri i Kombëtares shqiptare, Gianni De Biasi, do të largohet nga pankina kuqezi pas Europianit të Francës. Në një intervistë për televizionin “Ora News” në mbrëmjen e dy ditëve më parë, ish-kapiteni i përfaqësueses ka folur për çështjet më “të nxehta” të Kombëtares, duke nisur nga përzgjedhja e lojtarëve për Europianin “Francë 2016”, tek e ardhmja e italianit dhe deri te polemikat më të fundit të trajnerit të Kosovës, Albert Bunjaki.
Rudi, Kombëtarja është mbledhur për dy miqësoret ndaj Kosovës dhe Gjeorgjisë, në një kohë që mendja është tek Europiani…
Së pari, për mua dhe besoj se edhe për çdo shqiptar anembanë botës, mendoj se është një arritje e madhe që u kualifikuam për në Europianin e Francës. Kjo i ka dhënë kombit tonë vlera të jashtëzakonshme.
Tashmë duket sikur do bëhet çështje para kohe përzgjedhja e lojtarëve. De Biasi ka thënë se do të zgjedhë nga grupi prej 32 lojtarësh që u angazhuan në eliminatoret e fundit, në një kohë që të grumbulluar në Francë do të jenë vetëm 23 futbollistë…
Mendoj se De Biasi ka të drejtën absolute të veprojë kështu. Gjithsesi, ai mund të thotë diçka tani, por mund të veprojë ndryshe kur të vijë momenti i Europianit. Në futboll gjërat ndryshojnë shpejt dhe nuk është gjithçka absolute. Atë situatë që trajneri mund ta ketë sot, ndoshta nuk e ka pas 6 muajve. Unë jam i sigurt se De Biazi ka edhe 2-3 “asë nën mëngë”, pra lojtarë të rinj që do të grumbullojë.
Jeni i mendimit se duhet vlerësuar më shumë grupi i lojtarëve që e çoi ekipin në Europian?
Unë besoj se shumica e lojtarëve që na kualifikoi meritojnë të jenë në Europian. Sigurisht që mund të ketë edhe ndonjë surprizë gjatë rrugës. Pse të mos kemi ndonjë lojtar që na shton vlerat.
E prisni që De Biasi të ketë shumë presion për listën përfundimtare?
Natyrisht që ka presion, i cili do të vijë në rritje. Ambienti ynë dihet dhe mendoj se nuk do ta ketë të lehtë trajneri. Por, me eksperiencën që ka fituar dhe mënyrën sesi i ka kuptuar gjërat në Shqipëri, ai do të dijë ta menaxhojë më së miri edhe këtë moment. Do të ketë ndoshta më pak stres, sesa një tjetër trajner shqiptar që mund të ishte në pozicionin e tij.
Si e kuptuat deklaratën e trajnerit se “do të luajë ai që është në formë dhe jo kush paguan”?
Kështu duhet të jetë dhe ekziston kudo, por në Shqipëri ka njerëz që mendojnë se përmes parave mund të arrijnë gjithçka. Ne prandaj kemi probleme si vend dhe miqësia ka qenë pjesë e jetës së çdo shqiptari. Ndoshta shpeshherë u është ngrënë haku atyre lojtarëve që kanë pasur vlera dhe vendin e tyre e kanë zënë të tjerë që nuk e kanë merituar. Me De Biasin kemi bërë shumë gjëra të mira, por bashkë me FSHF-në. Presidenti Duka ka meritë për përzgjedhjen e trajnerit, pasi nëse nuk do të kishim De Biasin, atëherë nuk do të ishim në Europian.
A mund të bëjë ndonjë surprizë Kombëtarja në Europian, duke kaluar grupin?
Sa më i suksesshëm të jesh, aq më tepër rritet përgjegjësia. Ne presim më shumë tashmë nga skuadra, por nuk është normale që të mendojmë se vetëm ata do të shkojnë aty për formalitet. Nëse eliminohemi nuk ka asgjë të keqe, sepse kjo është diçka e pritshme, pasi arritja më e madhe për ne është mbërritja deri në Europian. Është diçka logjike, por nëse bëjmë një surprizë, do ishte fantastike. Edhe formati i UEFA-s të bën të besosh. Kjo është e bukura e Europianit, sepse çdo gjë ka ndryshuar. Unë jam optimist dhe njëkohësisht realist. Besoj se çdo gjë është e mundur, sepse ne nuk kemi presionin e fitores, Shqipëria thjesht do të luajë për krenarinë e kombit. Presionin do ta kenë kundërshtarët tanë, pasi janë më me traditë dhe më lart se ne, prandaj dhe do ta kenë për detyrim fitoren.
Me nuhatjen tuaj, si e shikoni të ardhmen, a do të ketë ndryshime te Shqipëria pas Europianit?
Di të them se De Biasi do të largohet.
Përse mendoni kështu?
Sepse e ka mbaruar misionin me arritjen në Europian dhe këtu përfundon gjithçka. De Biasi bëri dy edicione te Shqipëria, teksa u kritikua shumë në të parin dhe triumfoi në të dytin. Tashmë ai do të kërkojë të marrë maksimumin nga Europiani dhe më pas të iki. Jam i bindur që De Biasi ka dy-tri alternativa të tjera, që i ka të gatshme dhe pas Europianit do të zgjedhë më të mirën për karrierën e tij.
Trajneri i Kosovës, Albert Bunjaki, është ankuar për lojtarët që i ka marrë Shqipëria së fundmi. Si e gjykoni këtë situatë?
Ne pretendojmë të jemi një komb, por duhet të kuptojmë se edhe dy vëllezër në një shtëpi ngatërrohen me njëri-tjetrin. Rëndësi ka që duhemi dhe është e natyrshme që do të debatojmë. Pra, Shqipëria do të marrë tani ndonjë “gur” te Kosova dhe herë tjetër do të na i marrin ata. Rëndësi ka që të ekzistojë paqja dhe harmonia, kjo është primare. Pastaj, kur Kosova të anëtarësohet, lojtarët do të bëjnë llogaritë e tyre për karrierën dhe përderisa Shqipëria është aktualisht në Europian, është krejt e logjikshme që kosovarët të vishen kuqezi.
PANORAMA
