Policia Rrugore i bënë thirrje drejtuesve të automjeteve të respektojnë rregullat e qarkullimit rrugor, për një udhëtim të sigurt për veten dhe përdoruesit e tjerë të rrugës. Sipas Policisë rrugore, në vetëm 2 ditë janë ndëshkuar mbi 350 drejtues mjetesh
Drejtoria e Policisë Rrugore, përmes një video sensibilizuese, thekson se sjelljet jo të hijshme të drejtuesve të mjeteve, ndëshkohen me masën përkatëse administrative, pasi rrezikojnë jetën e vetë drejtuesit, por dhe përdoruesve të tjerë të rrugës. Sipas policisë Rrugore, sjelljet negative nuk duhet të prekin drejtuesit korrekt të automjeteve.
“Edhe pse çdo ditë, në kryqëzimet kryesore të kryeqytetit, konstatohen dhe ndëshkohen një numër i madh drejtuesish mjetesh, pikërisht për mos pozicionim siç duhet në korsinë e lëvizjes, përsëri shumë të tjerë, nuk reshtin së shkeluri normat e sjelljes, sinjalizimin rrugor horizontal dhe vertikal, duke u kthyer në rrezik por edhe shqetësim njëkohësisht për përdoruesit e tjerë të rrugës, që respektojnë normat e sjelljes në trafik”, lexohet në njoftimin e Policisë Rrugore.
“Sjellje të tilla, reflektojnë jo vetëm nivel të ulët të edukatës rrugore, por shërbejnë edhe si steriotipe negative për brezat e rinj të përdoruesve të rrugës, të cilët të afektuar nga “efekti i turmës”, keq – edukohen me një mënyrë të rrezikshme drejtimi, pa menduar për pasojat dhe rreziqet që u kanosen atyre në çdo moment”, përfundon njoftimi Policisë.
/a.r
