Media ka siguruar kërkesën e prokurorisë së Kukësit për masat e sigurisë ndaj 23 protestuesve.
Sipas kërkesës Prokuroria kërkon në gjykatë 11 masa arrest me burg, 5 arrest shtëpie dhe shtatë detyrim paraqitje. Prova kryesore e prokurorisë së Kukësit për protestuesit janë pamjet filmike dhe dëshmitë e policëve.
Protesta masive është zhvilluar në fundjavë nga banorët e Kukësit kundër vendosjes së taksës për kalimin e mjeteve në Rrugën e Kombit. Mijëra qytetarë të Kukësit dhe Kosovës kanë kundërshtuar pagesën e përcaktuar nga qeveria dhe koncesioni i mirëmbajtjes së rrugës. Në tubim nuk kanë munguar dhuna dhe përplasja mes protestuesve dhe forcave të rendit.
Në kërkësën e Prokurorisë thuhet se protesta u zhvillua pa miratimin e lejes nga komisariati i policisë lokale. Gjithashtu Prokuroria e Kukësit akuzon protestuesit për plagosjen e 12 efektivëve të policisë
Policët kanë dëshmuar se janë goditur nga protestuesit të cilët kanë thyer edhe terminalin e pagesave
Në kërkesën e prokurorisë shpjegohet se janë marrë në pyetje 15 efektivë policie
Qytetarët kanë zgjedhur si formë proteste bllokimin e rrugës, ndërkohë që forcat policisë janë mundur t’i largojnë me dhunë nga rruga. Protesta nisi pas publikimit të tarifave. Sipas koncesionit të miratuar me vendim qeverie, çdo mjet autoveturë do të paguajë 10 euro (vajtje-ardhje) në rrugë, ndërsa për mjetet e tonazhit të rëndë pagesa është 20 euro (vajtje-ardhje) në Rrugën e Kombit. Banorët e Kukësit dhe Kosovës janë ata që prekën direkt nga kjo taksë e qeverisë.
Protestuesit janë përplasur me policinë në momentin që kanë tentuar të prishin aparaturat e vendosura për vjeljen e taksës. Protestuesit kanë qëlluar me gur në drejtim të policisë dhe traut ku janë vendosur pikat e kompanisë private.
Protestuesit u përleshën me forcat e policisë, ndërsa më pas, i vunë edhe zjarrin sportelit të vjeljes së taksës. Ata nuk lejuan as ndërhyrjen e zjarrfikëses për shuarjen e flakëve.
Policia u tërhoq në një distancë të konsiderueshme. Protesta ka bllokuar prej gati 2 orësh edhe lëvizjen normale të automjete, duke krijuar radhë që shkojnë deri në 10 kilometra, nga dogana deri në sportel. Ndërkohë banorët deklaruan për mediat se protesta ishte ideuar si paqësore dhe dhuna ka nisur pas provokimit nga ana e policisë. /Ora News.tv/
