Kuvendi u mblodh sërish në seancë plenare pasdite pasi Komisioni për verifikimin e mandateve konstatoi se mandatet e 140 deputetëve janë të vlefshëm. Seanca e pasdites vijoi me betimin e deputetëve si dhe zgjedhjen e kryetarit të Kuvendit, ku kandidatura e vetme ishte Gramoz Ruçi.
Ky i fundit u zyrtarizua në krye të Kuvendit me 80 vota. referuar shpërndarjes së mandateve, rezulton se Ruçi ka marrë 2 vota nga opozita. Pasi PS ka 74 mandate, duke shtuar 3 mandatet e PDIU dhe mandatin e Tom Doshit numri shkon në 78.
Dy votata e opozitës mendohet se janë nga PD pasi LSI nuk mori pjesë në votim.
Pas zyrtarizmit në krye të Kuvendit, Gramoz Ruçi ka mbajtur një fjalim para deputetëve. Ai u shpreh se do të jetë garant i respektimit të kushtetutës. Po ashtu Ruçi deklaroi se do t’i krijojë opozitës kushtet për të ushtruar detyrën dhe misionin e saj.
“Mirënjohje të thellë për besimin që më dhatë, duke më zgjedhur Kryetar të Kuvendit të Shqipërisë, një detyrë fisnike. Dëshiroj të shpall që në fillim se gjatë ushtrimit të kësaj detyre do të jem garant i zbatimit të Kushtetutës, do të jem garant i rregullores dhe kurdoherë në shërbim të qytetarëve. Për qytetarët Kushtetuta është themeli i të drejtave, kurse për ne ligjvënësit është themeli i detyrimeve në shërbim të të drejtave të gjithë qytetarëve. Jam i vetëdijshëm se drejtimi i legjislativit ëhstë detyrë supreme sepse Kuvendi ëhstë i vetmi isntitucion pluralist. Vullneti i popullit ja delegoi qeverisjen një partie të vetme, përgjegjësia jonë do ua kthejë këtë pushtet qytetarëve nëpërmjet ligjeve e reformave që do të hartojë ky parlament. Ku kuvend është rezultat i vendimit qytetar por nisur nga bindjet dhe morali im politik do t’i bëja thirrje shumicës se fitorja nuk është gjithçka. Misioni ynë ka qenë dhe është t’u shërbejmë pa përjashtim qytetarëve. Opozita nuk i shërben shumicës, as qeverisë por zhvillimit të vendit”, deklaroi Ruçi.
Ai tha se “ne do të hartojmë ligje të drejta, të mbështetura në moral të drejtë. Fryma e ligjeve do të garantojë bashkëqeverisjen”.
Deputetja Vasilika Hysi deklaroi më herët se pas verifikimeve të kryera nga Komisioni i përkohshëm e Verifikimit të Mandateve, nuk u konstatua asnjë rast i pavflefshmërisë së mandateve.
/a.m.
