Plakja e popullsisë, stili i jetesës por edhe pasojat e Covid-19 po çojnë në shtim të numrit të personave që vuajnë nga sëmundjet kronike.
Raporti i monitorimit të Ministrisë së Shëndetësisë tregon se rritja e këtyre sëmundjeve për 2023-shin është 5.9% në krahasim me vitin 2022.
Hipertensioni është sëmundja më e shpeshtë në popullatë, pasuar nga diabeti ku janë mbi 90 mijë qytetarë të diagnostikuar
“Vendin e parë dhe rastet më të shpreshta janë pacientët që trajtohen me hipertension. diabeti është sëmundje që pas covid ka marrë hov dhe ka më të tepër raste, pra ka pësuar një trend rritje. Sëmundjet kardiovaskulare, sidomos ato ishemike kanë më pak raste por zënë vendin e tretë” , thotë mjekja e familjes, Xhentiljana Nazaj.
Më të rrezikuarit janë personat mbi 60 vjeç, por mjekët tregojnë se vitet e fundit po preken edhe moshat e reja.
“Kemi pasur një ulje të moshës të këtyre sëmundjeve kronike. kequshqyerja, jeta sedentare, mungesa e aktivitetit fizik, këto kanë ndikuar”, thotë mjekja e familjes, Xhentiljana Nazaj. Rritja e sëmundjeve kronike ndikon edhe në ecurinë e shpenzimeve të rimbursimit të ilaçeve.
