Këshilli Kombëtar i Punës do të mblidhet të premten për të diskutuar rritjen e pagës minimale për sektorin privat.
Aktualisht, minimumi me të cilin biznesi mund të paguajë punonjësit, me ligj është 22 mijë lekë. Por përfaqësuesit e sektoit privat thonë se ky vendim mund të sjellë efekte negative.
“Ka gjasa të rrisim në mënyrë artificiale kostot e produkteve dhe efekti do të jetë: ose do të reduktohet eksporti, ose bizneset do të jenë të detyruara të reduktojnë punonjësit, me rentabilitet të ulët”, thotë Alban Zusi, president i Qendrës Shqiptare të Eksporteve.
“Këto lekë do merren tek përfitimi neto i ndërmarrjes që është rreth 8.7 për qind, i cili do të zvogëlohet dhe do të vejë në 3.4 për qind. Nuk ka asnjë ekonomist në botë që pas kësaj goditjeje të sugjerojë vazhdimin e këtij biznesi sepse është i suksesshëm”, thotë Gjergji Gjika, kryetar i Dhomës së Fasonistëve.
Megjithatë, Gjika e ka një propozim. “Të propozohet një rritje 5 për qind dhe me këtë nivel ne mund të ulemi të diskutojmë. Por nëse shkohet më tutje është e palogjikshme”, thotë Gjika per tch.
Ndërsa Alban Zusi, i cili ka qenë vetë pjesë e kësaj qeverie, i kërkon sot asaj zhveshjen e biznesit nga disa kosto që nuk sjellin vlerë të shtuar.
“Për shembull, heqja e detyrimit për përkthim dhe noterizim të certifikatave veterinare dhe fito-sanitare në import. Është një kosto prej 5 milionë euro burim real, që mundëson qoftë edhe rritjen e pagave”, thotë Zusi./a.m.
