Nga 1 janari i këtij viti sipas vendimit të qeverisë, hyn në fuqi edhe ligji i rritjes së pagës minimale në Shqipëri nga 40 mijë lekë në 50 mijë lekë.
Eksperti i ekonomisë, Enriko Ceko i ftuar në emisionin “Aldo Morning Show” në Tv Klan trego se do të përfitojnë nga ky vendim i qeverisë, punëtorët veçanërisht ata që kanë pasur paga të ulëta, sepse në xhepat e tyre do të futen më shumë para.
“Shtresa e mesme është ajo që tatohet edhe te pagat, edhe te tatimi mbi të ardhurat e tjera. Në të vërtet kjo rritja e pagës është barrë e bizneseve. Nëse do i ndajmë bizneset në kompani, me përgjegjësi të kufizuar, kompani të mëdha që kanë shumë punëtorë, dhe bizneset familjare apo ato individuale këtë gjë e pësojnë më shumë bizneset familjare dhe individuale.
Ai që ka një biznes më të madh ka mundësi që të ndërtojë një plan biznesi, ku mund të gjenerojë më shumë të ardhura, ka më shumë mundësi për të reduktuar kostot. Në përgjithësi bizneset familjare dhe ato individuale kanë barrë më të rënda se sa ato më të zgjeruara”, tha eksperti i ekonomisë.
