Bilanci i epidemisë së koronavirusit ka shkuar në 259 të vdekur në Kinë, ndërsa 2.102 raste të reja u regjistruan të premten, me mbi 11 mijë të infektuar të konfirmuar.
Sipas Komisionit Kombëtar të Shëndetit Kinez, 42 nga 46 viktimat e reja janë regjistruar në provincën e Hubei, ku filloi infeksioni. 18 raste janë identifikuar deri më tani në Evropë, përfshirë dy në Itali.
Vonesat e autoriteteve lokale të Wuhan në zbulimin e rasteve kanë përkeqësuar situatën e epidemisë. “Në këtë moment ndjehem në faj”, ka pranuar Ma Guoqiang, sekretari i partisë komuniste kineze të Wuhan, partia që ka shumicën në këtë bashki.
“Nëse do të ishin marrë masa më rigoroze, rezultati do të ishte ndryshe dhe më i mirë nga aktualiteti ku ndodhemi”, duke pranuar për herë të parë vonesa në zbulimin e raste me koronavirus.
Ndër rastet e tjera të raportuara në Evropë, gjashtë raportohen në Francë, gjashtë në Gjermani, dy në Itali, dy në Mbretërinë e Bashkuar, një në Finlandë dhe një në Suedi. Bilanci vjen nga Qendra Evropiane për Kontrollin e Sëmundjeve.
Në Francë personat e prekur janë një burrë 48-vjeçar që ka udhëtuar së fundmi në Wuhan, në izolim në spitalin e Bordeaux që nga 24 janari; dy persona të tjerë kohët e fundit u kthyen nga Wuhan, të dy nga e njëjta familje; një turist 81-vjeçar kinez nga krahina e Hubei që mbërriti në Francë në 16 janar, simptomat e të cilit u shfaqën në 22 janar dhe u shtrua në spital në Paris në 25, si dhe një i afërm i tij që rezultoi pozitiv për koronavirusin në 29 Janar. Më 30 janar, u konfirmua rasti i parë i transmetimit lokal tek një mjek francez, i cili rezultoi pozitiv për virusin pasi kishte trajtuar një pacient që u kthye nga Azia.
Në Gjermani, në mesin e gjashtë personave të sëmurë, është një burrë 39 vjeç, i cili rezultoi pozitiv më 27 janar (dhe tani është në izolim) pasi pati kontakt në vendin punë me një burrë 33-vjeçar nga Shanghai, dhe katër persona të gjithë punonjës të së njëjtës kompani në Bavari. Edhe një fëmijë, djali i një prej pesë punonjësve, u infektua gjithashtu nga patogjeni në Bavari. Është rasti i parë i një personi të infektuar në Gjermani nga dikush i infektuar më parë.
Në Finlandë, rasti i parë u konfirmua më 29 janar dhe ka të bëjë me një person që mbërriti nga Wuhan, i cili ra në kontakt me 15 persona të tjerë, të gjithë të identifikuar dhe të cilët do të monitorohen për 14 ditët e ardhshme. /e.s/
