Ky vit ka nisur mjaft optimist, sa i përket sektorit të turizmit në vendin tonë.
Sipas ekspertëve kemi një rritje me mbi 8% të interesit të të huajve për Shqipërinë. gjatë kësaj periudhe, ku dominojnë vizitorët europianë, që ndalesen e parë e kanë në kryeqytet.
“Janari, shkurti, marsi kanë ecuri shumë të mëdhaja, diku mbi 8% krahasuar me vitin e kaluar. Më tepër janë europianët, të cilët e vizitojnë e numri më i lartë i tyre janë gjermanët, francezët, italianët e përfshirë edhe vendet e rajonit. Vendet ku përqëndrohen kryesisht janë Tirana, Durrësi dhe Kruja duke qenë se janë edhe më afër me aeroportin tonë dhe një pjesë e mirë e tyre kryesisht shohin atë pjesë, historinë e vjetër që ne kemi”, pohoi Arber Ndreu, eksperti i Turizmit.
Gjatë pranverës, fundjavat kanë më shumë fluks vizitorësh të huaj të grupmoshave të ndryshme.
“Turizmi po bëhet gjithvjetor. Të gjitha destinacionet e Shqipërisë tani janë kthyer në destinacione që frekuentohen nga të huajt, më tepër në fundjavë. Një pjesë e mirë e tyre preferojnë të premten, të shtunën, të dielën kryesisht për të patur mundësi të pushojnë në Shqipëri. Kanë interest të vijnë edhe të rinjtë, në pjesën më të madhe të rasteve vijnë në mënyrë individuale e jo me grupe ose me paketa. Te grupet mbeten mosha e mesme apo mosha e tretë, të cilët me grupe të organizuara vijnë të vizitojnë vendin tonë”, deklaroi Ndreu.
Pritshmëritë për 2026 nga tur-operatorët dhe ekspertët mbeten të larta për një sezon turistik me flukse vizitorësh gjithnjë e në rritje.
