Shqiptarët kanë rritur ndjeshëm kërkesën për kredi bankare për blerje banesash. Sipas të dhënave të Bankës së Shqipërisë, vetëm në tetor 2025, bankat disbursosën 4.7 miliardë lekë për këtë qëllim, një rritje prej 35% krahasuar me të njëjtën muaj një vit më parë.
Gjatë 10 muajve të parë të vitit, vlera totale e huave për shtëpi ka shënuar një rekord historik, duke arritur në 54.7 miliardë lekë. Kjo shifër është 26.6% më e lartë se në periudhën njëvjeçare të kaluar, duke konfirmuar një kërkesë të fortë pavarësisht masave kufizuese të vendosura nga autoritetet.
Ky ‘boom’ kredish ndodh paralelisht me një treg pasurish shumë aktiv. Sipas ekspertit Gjin Gjoka nga tregu I Real Estate, Çmimet e banesave në Shqipëri u rritën mesatarisht 20-25% gjatë 2025-së, ndërsa qiratë arritën nivele rekorde. Ekspertët e tregut theksojnë se kërkesa e fuqishme, veçanërisht nga diaspora, dhe oferta e kufizuar janë faktorët kryesorë prapa kësaj rritjeje.
Përpara, tregu vëzhgohet në një fazë pritjeje për rezultatet e rivlerësimit të pronave që fillon në janar 2026, ndërsa parashikohet një vazhdim i rritjeve të çmimeve në vitet në vijim.
Eksperti paralajmëron se integrimi i Shqipërisë në BE dhe rritja e standardeve të ndërtimit do të çojnë në një rritje të pashmangshme prej mbi 50% të çmimeve të pasurive të paluajtshme deri në 2027.
“Çdo njeri i cili ka për të blerë është vonë dhe sa më shpejt të drejtohet dhe të blejnë, sepse pritet që brenda 2027-s që ne presim që të hapet porta e parë e Bashkimit Europian për Shqipërinë, pra të futem këmbën e parë, do jetë mbi 50% çmimi do ketë rritje.”
Gjoka thotë se një pjesë e konsiderueshme (15-20%) e 55 mijë apartamenteve të mbyllura në Tiranë i përkasin emigrantëve dhe janë lënë të papaguara e të papërdorura për dekada, por ligji i ri për mirëmbajtjen pritet t’i nxisë pronarët t’i fusin në treg, duke e rritur ofertën dhe duke ndikuar në uljen e qirave.
