Në janar-prill u përdorën për projektet e investimeve 10.2 miliardë lekë nga 7.2 miliardë vitin e kaluar. Kjo shumë, sipas të dhënave nga Ministria e Financave, është e shpërndarë në afërsisht 400 zëra dhe projekte, ku dominon përgjithësisht financimi me vlera të vogla. Rezulton që këtë vit elektoral të jenë përshpejtuar ndjeshëm ritmet e shpenzimeve buxhetore kapitale, ndonëse mazhoranca ka miratuar së fundi një ligj, që ndalon tejkalimet e ndjeshme në këtë fushë në periudha zgjedhjesh. Por shihet se shuma e disbursuar është së paku 40% më e lartë se e njëjta periudhë e vitit të kaluar.
Projektet
Projekti më i financiar është një zë shpronësimesh, prej 1.3 miliardë lekësh ose rreth 10 milionë euro që është përdorur si kompensim për ndërtimin e infrastrukturës energjetike, sipas të dhënave nga Ministria e Financave. I dyti në radhë për sa i përket financimit vjen projekti i rrugës Qukës–Qafë Plloçë që ka marrë nga buxheti i shtetit për tre muajt e parë një financim prej 941 milionë lekësh ose 6.8 milionë euro. Projekti i tretë për financimet është ndërtimi i segmentit rrugor Tiranë – Elbasan, me 480 milionë lekë ose 3.3 milionë euro.
Këto dy segmente janë lënë në mes të rrugës nga qeveria Berisha për mungesë fondesh, për më pas dolën edhe probleme serioze të projektimit. Rruga nga Qukësi në Qafë Plloçë, e cila shkurton shumë distancën drejt Korçës, pësoi ndryshime të mëdha në projekt, ndërkohë që rruga e re e Elbasanit u vonua katër vjet, pas shembjes masive të faqeve të malit në Ibë, që nuk ishte parashikuar nga studimet e mëparshme gjeologjike.
Më tej, financimet më të mëdha janë marrë nga projekti i furnizimit me ujë të qyteteve të Durrësit dhe Kavajës dhe impianti i prodhimit të energjisë nga mbetjet në Tiranë, inceneratori i Elbasanit etj.
Në kuadër të financimit të projekteve publike, prioritetet janë zhvendosur dukshëm, nga ndërtimi i rrugëve nacionale, në investime në sektorin e energjisë, ujit, përpunimit të mbetjeve dhe rrugëve dytësore. Ministria e Transportit raportoi se nëpërmjet Autoritetit Rrugor Shqiptar ka ndërtuar vitin e kaluar vetëm 19.4 kilometra rrugë, nga të cilat 13.7 kilometra i takojnë financimit të jashtëm dhe 5.7 kilometra financimit të brendshëm.
Sipas të dhënave zyrtare nga Ministria e Transportit, me financim të brendshëm janë ndërtuar 5.7 kilometër me një kosto 4.3 miliardë lekë. Kosto e ndërtimit me fonde të brendshme ishte 767 milionë lekë ose 5,6 milionë euro për kilometër. Kostoja nga financimi i huaj ka qenë shumë më e ulët. Sipas të dhënave nga Ministria e Transportit, gjatë vitit 2016 janë ndërtuar nga financimet e huaja 13.6 kilometër kundrejt financimit 3.3 miliardë lekë. Përllogaritjet tregojnë së një kilometër rrugë e financuar nga fondet e huaja ka kushtuar 1.7 mln euro./Shqiptarja/a.m.
