Komisioni Qëndror i Zgjedhjeve nuk ka marrë vendim në lidhje me kërkesën e PS-LSI për shtyrjen e afateve të regjistyrimit të koalicioneve. Pas debateve të zhvilluara, kryetari i KQZ Denar Biba deklaroi se nuk ka bazë ligjore për një venbdim të tillë. Edhe pse ai e ka vlerësuar kërkesën, tha se KQZ nuk mund të merrte një vendim. Edhe përfaqësuesit e pakicës më herët e kundërshtuan kërkesën e PS-LSI.
“Pa opozitën do ketë zgjedhje por jo një proces të mirëfilltë. Nuk ka bazë ligjore që të marim një vendim. Kërkesën e çmoj por KQZ nuk duhet të marrë vendim. Nëse KQZ merr një vendim duhet të jetë unanim e gjithëpërfshirës. PS dhe LSI japin argument politik dhe jo juridik”, tha Denar Biba.
****
Salianji: KQZ të shprehet nëse shtyrja e afatit e cënon procesin
E përditësuar – Eridian Salianji, përfaqësues ligjor i Partisë Socialiste në Komisionin Qendror të Zgjedhjeve tha të enjten se, shtyrja me disa ditë e afatit ligjor për regjistrimin e koalicioneve në zgjedhje nuk e cënon procesin dhe as Kushtetutën, por synon t’i japë mundësi opozitës të hyjë në zgjedhje.
KQZ ka nisur te enjten diskutimin e kërkesës së PS-LSI për shtyrjen e afatit ligjor për regjistrimin e koalicioneve. Eksperti ligjor i PS-së argumentoi arsyet e shtyrjes së afatit, duke theksuar se më e rëndësishme se kjo është hyrja e opozitës në zgjedhje.
“Kjo kërkesë e jona vjen në një kohë jonormale sa i takon procesit elektoral, pasi situata politike në vend nuk është e mirë, pasi kemi opozitën që nuk është e regjistruar për zgjedhjet e 18 qershorit. Ndaj PS dhe LSI, në vijimësi ka kërkuar që opozita si institucion, të bëhet pjesë e zgjedhjeve dhe gjatë kësaj kohe dhe në ditët në vazhdim janë negociatat që do ti bënin të mundur opozitës të hyjë në zgjedhje, qe është një e drejtë dhe detyrim i saj. Data e zgjedhjeve është ditë e shënuar dhe ne do japim gjithë kontributin tone që opozita të jetë në zgjedhje. Ne kërkojmë një qëndrim nga ju nëse shtyrja e afatit ligjor e cënon procesin zgjedhor? Por, më e rëndësishme se afatete per ne është hyrja e opozitës në zgjedhje. Ne e njohim ligjin dhe bazuar mbi të kemi bere dhe kërkesën”, argumentoi kërkesën e PS-LSI juristi Salianji.
Ndërkohë, përfaqësuesi ligjor i PD në KQZ Ivi Kaso, ka shprehur kundërshtitë e forcës që përfaqëson në lidhje me kërkesën e PS-LSI.
Debatet:
Ivi Kaso: Kisha shumë gjëra për të thënë. Qëndrimi i opozitës së bashkuar është bërë i ditur me një material për shqyrtimin e kërkesës së paraqitur. Që ditën e diel i është bërë i ditur KQZ. Fjala e Salinajit nuk ishte për tu mbajtur në KQZ, por në sallën e Kuvendit, apo në një ambient tjetër. Shpreh mirënjohje dhe për pranimin e krizës së thellë politike që i bëri përfaqësuesi socialist.
Denar Biba: Edhe këto janë fjali për Kuvend.
Ivi Kaso: Janë shqetësime të prekura. I kërkohet mirëkuptim KQZ që të garantohen të drejtat e opozitës. Të drejtat kushtetuese të partive i garanton Kushtetuta. Duhet të bëjmë shumë kujdes kur sjellim këto argumente. Kushtet e opozitës ia krijon Kushtetua dhe ligjet e vendit. Opozita vetëm ato që i garanton Kushtetua, merr. Ajo që mund t’i jepet krizës institucionale, është dialogu dhe gjithë përfshirja politike. Kjo është një kërkesë, (Për shtyrjen e afatit të regjistrimit) që nuk di të qeshësh apo të qash, apo frymë të ligjit që e mbështet. Ligji thotë se nuk mund të pranohet kur paraqitet më vonë, si pas 60 apo 70 ditësh. KQZ më herët i ka konsideruar këto shkelje. KQZ nuk ka kompetencë për të marrë vendim tjetër. Kjo është shkelje e qartë dhe e pastër e ligjit dhe akrobaci zgjedhore. Refuzoni të zgjidhni problematika që nuk i keni krijuar më parë dhe nuk keni kompetencë.
Eridian Salianji: Ju si organ partiak a jua cenon procesin zgjedhor? A jeni të aftë që të siguroni zgjedhje të lira dhe të ndershme?
Ivi Kaso: Cenohet besueshmëria, s’ka cenim më të rëndë. E vetmja gjë që ju mban ju është dispozita ligjore që është shkruar të zezë mbi të bardhë. Kjo është shkelje.
***
Pas përfundimit të afatit ligjor për regjistrimin e koalicioneve mesnatën e 19 prillit, Komisioni Qendror i Zgjedhjeve është mbledhur të enjten për të shqyrtuar kërkesën e Partisë Socialiste dhe Lëvizjes Socialiste për Integrim që kerkojnen shtyrjen e këtyre afateve të parashikuara në Kodin Zgjedhor.
Në nisje të mbledhjes së sotme të KQZ-së zyrtarë të administratës zgjedhore konfirmuan se deri në orën 24:00 të së mërkurës nuk ka pasur asnjë kërkesë për regjistrim koalicionesh, ndërkohë që KQZ ka qënë ne pritje deri në skadimin e afatit ligjor në mesnate.
Dy ditë me parë, kryetarët e grupeve parlamentare te PS dhe LSI ju drejtuan me një letër KQZ-së, ku shprehen se janë në përpjekje të vazhdueshme për të negociuar me opozitën dhe për të mundësuar pjesëmarrjen e plotë të të gjithë spektrit ekzistues politik të vendit në zgjedhjet për Kuvendin. Dhe në këtë kontekst social-politik, vijon letra, i kërkohet KQZ-së të shqyrtojë mundësinë për shtyrjen e afatit të regjistrimit të partive politike në zgjedhje dhe të regjistrimit të koalicioneve zgjedhore.
Kjo kërkesë u kundërshtua të mërkurën nga opozita, e cila e konsideroi antiligjore dhe shkelje të hapur të Kodit Zgjedhor. Gjatë seancës së sotme parlamentare, kryetari i Kuvendit, Ilir Meta, tha se kërkesa ka për qëllim vetëm përfshirjen e opozitës në zgjedhjet e 18 qershorit. Pas tij, të njëjtën gjë përsëriti edhe kryeministri Rama nga foltorja e Kuvendit, i cili tha se maxhoranca nuk dëshiron të hyjë në zgjedhje pa opozitën./b.d
