Gjatë pesë javëve të fundit, nga veriu në jug të vendit po përballen në terren me shuarjen e zjarreve me qindra efektivë zjarrfikës, si dhe nga Forcat e Armatosura.
Ata janë përshirë në shuarjen e zjarrin në të gjitha format, duke rrezikuar madje edhe jetën.
Mjekët toksikologë thonë se në radhët e tyre ka pasur raste të intoksimit nga tymi për shkak të ekspozimit të gjatë në luftë më flakët, si dhe djegie, siç ishte rasti i komisarit tri javë më parë.
“Me rënien e zjarreve kemi pasur intoksikacione nga dioksidi i karbonit. Rastet kanë qenë relativisht të lehta dhe kanë marrë shërbimin në Urgjencë, përveç komisarit, i cili ka pasur djegie dhe dy diagnoza bashkë,” shpjegon toksikologia e QSUT-së, Matilda Kambo.
Gjatë një vatre zjarri në ajër emetohen gazra toksikë dhe substanca ndotëse shumë të rrezikshme për jetën, si monoksid karboni, dioksid karboni, dioksid squfuri, benzene dhe gazra të tjerë helmues, të cilët hyjnë thellë në mushkëri, gjak dhe tru.
“Dioksidi i karbonit është i rëndë. Mund të të marrë edhe jetën. Varet se kohë je i ekspozuar në tym, pastaj ndodh komplikacioni. Nëse ekspozohesh gjatë mund të humbasësh koshiencën dhe fillon intoksikohet truri, gjaku, i gjithë organizmi,” thotë Dr. Kambo.
Zjarrvënia është e barabartë me vdekjen. Zjarrfikësit janë në vijën e parë të rrezikut dhe ekspozimi i përsëritur ndaj tymit dhe toksinave, edhe me maska mbrojtëse, rrit rrezikun për helmime dhe sëmundje kronike gjatë jetës.
