Një avion i kompanisë “Delta Airlines” u rrëzua gjatë uljes në aeroportin ndërkombëtar “Pearson” të Torontos në Kanada.
Avioni, një Bombardier CR900 me 80 persona në bord, ku 76 ishin pasagjerë dhe katër ishin anëtarë të ekuipazhit, ishte nisur nga Minesota për në Toronto.
Pamjet tronditëse nga vendi i ngjarjes tregojnë avionin me kokë poshtë në pistën e aeroportit, ndërsa pasagjerët u panë duke dalë nga avioni dhe duke ecur në pistën e akullt.
18 persona, mes tyre tre fëmijë, mbetën të plagosur si pasojë e përmbysjes së avionit, ku disa pësuan lëndime të rënda dhe u transportuan në spital.
Temperaturat e ulta, prania e mjegullës dhe stuhia e borës mendohet se janë bërë shkak për rrëzimin e avionit.
“Jam e lehtësuar kur mësova se të gjithë pasagjerët dhe ekuipazhi janë gjallë pas rrëzimit të aeroplanit në Toronto Pearson”, tha kryebashkiakja e Torontos Olivia Chow.
Bordi për Siguri të Transportit të Kanadasë ka thënë se ka angazhuar një ekip për të kuptuar se si ka ndodhur saktësisht aksidenti.
Dy pista do të jenë të mbyllura për disa ditë për hetime dhe pasagjerëve u është thënë se mund të përballen me vonesa.
Përplasja është incidenti i katërt i madh i aviacionit në Amerikën e Veriut duke përfshirë një përplasje vdekjeprurëse në ajër midis një aeroplani pasagjerësh dhe një helikopteri ushtarak pranë aeroportit Ronald Reagan të Uashington DC, i cili vrau të gjithë 67 personat në bord, ndërsa të paktën shtatë persona vdiqën kur një aeroplan transporti mjekësor u rrëzua në Filadelfia dhe 10 u vranë në një përplasje avioni pasagjerësh në Alaskë.
