Sonte në orën 20:45 në Shkodër do të zhvillohet ndeshja Shqipëri-Itali, e vlefshme për eliminatoret e Kampionatit Botëror Rusi 2018, ndërsa qyteti verior do të blindohet nga forca të shumta policie.
Përballja me Italinë është më shumë se një ndeshje futbolli për shkak të marrëdhënieve shumë të mira me vendin fqinj duke e kthyer në një festë 90’ në Shkodër.
Katër herë kampionët e Botës vijnë për herë të parë në Shqipëri, ndërsa synojnë fitoren për të qenë në vazon e parë për fazën e ‘Play- Off’-it, ndërsa kuqezinjtë do të shpresojnë në një rezultat pozitiv për të mbajtur vendin e tretë në grup.
Për këtë ndeshje, e cila është e fundit për kuqezinjtë në këto eliminatore, do ketë kufizime lëvizje dhe bllokim të qarkullimit në disa akse rrugore të brendshme të qytetit të Shkodrës.
Ndërsa agjentë të SHISH, shërbimit italian AISM, Garda e Republikës, por dhe Policitë e Kosovës, Maqedonisë dhe Malit të Zi do të ‘rrethojnë’ sonte Shkodrën për të shmangur incidentet.
Policia e Shtetit në bashkëpunim me institucionet e tjera kanë hartuar një plan masash anti-terror për të bërë të mundur evidentimin e individëve ose grupeve ekstremiste të dhunshme dhe me tendenca të mprehta kriminale dhe terroriste. /b.d
