Nga Mero Baze
Mënyra se si Lulzim Basha shpjegon dështimin e tij, është shokuese. Me një qetësi mizore, ai u përpoq t’u shpjegonte disa gazetarëve një natë më parë, se ai humbi pasi Perëndimi zgjodhi Edi Ramën dhe se e detyroi atë (Bashën) të dilte nga çadra. Më tej akoma foli për perëndimorë të korruptuar, diplomatë të blerë këtu dhe në Bruksel etj. E gjithë filozofia mbrojtëse e tij për humbjen e thellë më 25 Qershor, mbetej fakti që Perëndimi nuk ishte në anën e tij, por të Edi Ramës dhe se kjo zgjedhje ishte bërë pasi Perëndimi ka zgjedhur një trafikant droge dhe mbrojtës të krimit.
Edhe pse në shumicën e saj kjo retorikë është një gjë që Basha e thotë pa shumë vetëdije, ajo në të vërtetë është retorika më antiperëndimore që zyrtarisht një lider shqiptar ka bërë kundër Perëndimit në Shqipëri.
Ky është qëndrimi i parë zyrtar i një lideri politik në Shqipëri, që i konsideron zgjedhjet në Shqipëri, vullnet të disa liderëve perëndimorë dhe jo popullit shqiptar, çka është një turp. Sipas Lulzim Bashës këtu vendimet i marrin disa perëndimorë dhe populli shqiptar nuk pyetet kur voton. Kjo përveçse është dëshmi e një politikani kok-kungull, nga ana tjetër është një kulturë politike që kultivon mosbesimin tek Perëndimi në Shqipëri, dhe pse jo urrejtjen, njësoj si propagandistët e ISIS, duke shpjeguar dëshpërimin e demokratëve, me fajin e Perëndimit.
Ky është investimi më i keq që mund të bëjë një politikan shqiptar kundër Perëndimit, duke shpjeguar problemet e veta si fatkeqësi që vijnë prej Perëndimi.
Nga ana tjetër e gjithë kjo që thotë, bie ndesh me gjithë retorikën e tij gjatë periudhës së çadrës dhe hezitimi për t’u futur në zgjedhje. E gjithë kjo e tregon atë një mashtrues.
Në atë kohë ai thoshte se çadra ka mbështetjen e Perëndimit, biles shkoi harxhoi dhe miliona dollarë për një foto me Trumpin në SHBA që e ngjiste në furgona rrugës. Kur e paska ditur që e ka Perëndimin kundër, mund t’ua thoshte këtë dhe të stukturohej si parti antiperëndimore, se ndoshta po kaq vota do kishte marrë, duke bërë betejë kundër tyre. Ka plot parti antiperëndimore në Evropë, që kundërshtojnë politikat evropiane dhe integrimin në Evropë. Gruevski ishte një i tillë. Keqardhja që Basha shprehu se Perëndimi braktisi Gruevskin, por zgjodhi Ramën, ishte një deklaratë që doli nga bindja e tij, se Perëndimi nuk është në anën e Gruevskit dhe aleatëve të tij siç ishte vetë Basha. Dhe ta thuash këtë është një tjetër skandal, pasi përveçse Gruevski ka ndjekur politika të qarta antiperëndimore dhe nacionaliste është dëshmuar dhe si një antishqiptar i madh. E megjithatë Basha shpreh keqardhje që Perëndimi nuk ishte në anën e tij.
Dhe së fundmi duke fajësuar Perëndimin për disfatën e tij, Basha u pret shpresën demokratëve për të ardhmen, pasi Perëndimi nuk ka ndërmend të ndryshojë parimet për Bashën. I vetmi shans është që Basha të ndryshojë në favor të Perëndimit. Dhe këtë duhet ta bëjë shpejt dhe me vepra jo me këtë retorikë antiperëndimore. Ndryshe izolimi i Perëndimit ndaj tij do të vazhdojë siç vazhdon, sa që edhe pritjen e rezultatit të zgjedhjeve të CDU në Berlin, më parë ftojnë Taulant Ballën se sa atë.
Përpjekja e tij për të ngulitur tek demokratët idenë fikse se ata janë në opozitë prej qëndrimit të Perëndimit kundër tyre, është dhe një banalitet politik, që zhvlerëson arsyet themelore përse një politikan ekziston dhe që ka të bëjë me fuqinë e votës së qytetarëve nda tij, me politikat e tij frymëzuese, dhe jo me konceptin konspirativ se zgjedhjet fitohen duke blerë Perëndimin.
Kjo e bën elektoratin e partisë së parë properëndimore të Shqipërisë, edhe më të dëshpëruar, pasi do t’u duhet të zgjedhin mes Lulzim Bashës dhe Perëndimit.
