Ngutia për të ndarë postet qeveritare në mes të partnerëve të koalicionit ka shkaktuar një pështjellim në emrat e ministrive të reja kosovare, shkruan Koha Ditore.Në programin e Qeverisë është përfshirë edhe Ministria e Zhvillimit Rajonal.
Por mandatari për formimin e Qeverisë së Kosovës, Ramush Haradinaj, kur kishte prezantuar emrat e kabinetit qeverisës, nuk e ka përmendur këtë ministri.
Në ekspozenë e tij para deputetëve, seancën e 9 shtatorit, Haradinaj kishte thënë se “ministër i Bujqësisë, Pylltarisë dhe Zhvillimit Rural” do të jetë Nenad Rikalo, ndërkaq “ministër i Zhvillimit Rural, Rasim Demiri”.
Gazeta ka kërkuar sqarime nga Zyra e kryeministrit përkitazi me këtë, por ka munguar përgjigjja e tyre.
Megjithatë sipas programit qeverisës, nuk do të ketë ministri të Zhvillimit Rural, por njëra prej dy ministrive të reja do të quhet Ministria e Zhvillimit Rajonal. Tjetra është Ministria e Inovacionit dhe Ndërmarrësisë, përgatiti Koha. (b.an)
