Autoritetet egjiptiane, të cilat po hetojnë rrëmbimin e anijes “Çelepia 2”, dyshojnë se Luan Mema ka mbështetur idenë e marinarit Adel Mohamed Salam, prandaj po mbahet në Egjipt.
Burime të gazetës theksojnë se nuk janë procedurat burokratike arsyeja që Luan Mema nuk po kthehet në Shqipëri. Sipas tyre, 36-vjeçari nuk po kthehet në vendin e tij të lindjes, sepse autoritetet egjiptiane e kanë të dyshuar si bashkëpunëtor të marinarit Adel Mohamed Salam dhe deri në sqarimin e pozicionit të tij, motoristi i anijes “Çelepia 2” do të qëndrojë në Egjipt.
Mësohet se hetuesit që po punojnë për zbardhjen e kësaj ngjarjeje nuk janë të bindur te deklaratat e Luan Memës, për vetë kushtet në të cilat u gjet 36-vjeçari dhe trajtimit që rrëmbyesi i kishte bërë kolegut të tij. Ndërkohë që tjetër fat pati kapiteni i peshkarexhës, Dhimitër Malaj, i cili nuk dihet se ku ndodhet.
Luan Mema mësohet të ketë deklaruar për autoritetet egjiptiane të hetimit se nuk kishte dijeni se çfarë kishte ndodhur me bashkëkombësin e tij, Dhimitër Malaj. Mema ka pohuar se kur ishte zgjuar, e kishte parë veten në hambarët e anijes të lidhur me zinxhir, ndaj nuk kishte informacion se çfarë mund të kishte bërë marinari egjiptian me kapitenin e anijes. Salam pati deklaruar se kapitenin e kishte lënë të lirë në brigjet e Kretës, në Greqi, me qëllim që të kthehej te familja e tij.
Por, kur kanë kaluar 26 ditë nga rrëmbimi i anijes “Çelepia 2” dhe ekuipazhit të saj, rrëmbimin e së cilës e mori përsipër marinari i egjiptian, Adel Mohamed Salam, nuk ka asnjë sinjal nga kapiteni Dhimitër Malaj. Fati i kapitenit të anijes mbetet mister, për shkak se nuk dihet vendndodhja e tij dhe çfarë ka ndodhur me të.
Deklaratat e Salam dhe Luan Memës, të cilët, sipas Ministrisë së Jashtme shqiptare, janë arrestuar pak ditë më parë, janë kontradiktore. Familjarët e kapitenit kërkojnë informacion nga autoritetet shqiptare në lidhje me vazhdimësinë e hetimeve për zbardhjen e kësaj ngjarjeje të rëndë, ndërsa shprehen se nuk kanë shpresa për ta parë të gjallë kryefamiljarin Malaj.
Autoritetet që supozohet se po kryejnë hetime për ngjarjen dhe kërkime për kapitenin Malaj heshtin, duke mos dhënë asnjë informacion se çfarë ka ndodhur gjatë rrëmbimit të anijes “Çelepia 2” dhe cili ka qenë skenari i marinarit rrëmbyes 30- vjeçar Adel Salam apo mbi fatin e kapitenit./panorama/a.k