Policia e Elbasanit ka arrestuar sot një 25-vjeçar për rrëmbimin e një vajze.
Shtetasi Tahir Abazi, me automjetin e tij tip “Renault” ka shkuar në gjimnazin e vajzës, një 17-vjeçare, dhe e ka marrë me forcë.
Vajza rezulton të jetë e dashura e Abazit, por këtë herë ky i fundit e ka hipur me forcë në automjetin e tij.
Pasi është larguar nga gjimnazi “Ahmet Dakli”, 25-vjeçari ka dalë nga rruga për shkak të shpejtësisë dhe është përplasur.
Për pasojë ka mbetur e lënduar vajza 17-vjeçare, e cila është dërguar në spitalin kirurgjik të Elbasanit, ku ndodhet jashtë rrezikut për jetën.
Ndërkohë, i dashuri i saj Tahir Abazi është shoqëruar në komisariatin më të afërt, për t’u marrë në pyetje mbi rrethanat e ngjarjes.
/ Top Channel
