Kryeministri Edi Rama ka paralajmëruar se për kantieret e ndërtimit do të ketë një rregullore të re. Sipas tij, dhen marrë masa që kush ndërton pallat të mos bëhet problem për zonën.
“Kush ndërton pallat nuk mund të bëhet problemi i zonës, por duhet të marrë masa që zona, aty ku bëhet fjalë për zonë të banuar, të mos e ndjejë fare. Duhet të marrë masa për të bërë rrethimet e duhura, pastrimet e duhura, për të mos nxjerrë në rrugë asgjë nga ato që bëhet aty brenda. Duke bërë kalime në trotuar me streha mbrojtëse e të tjerë”, tha Rama.
Nëse cënohet komuniteti dhe mjedisi, Rama paralajmëroi se masat “do të jenë drastike”.
Kreu i qeverisë theksoi se puna për lirimin e hapësirave publike nuk po vijon vetëm ndaj platformave, tendave apo strukturave të përkohshme. Ai njoftoi se ka një kontroll edhe të kantiereve.
“Kantieret nuk dalin në televizor sepse sikundër edhe kur beteja shkon në gjykatë ata kanë një forcë të caktuar për të kontrolluar mediat dhe gjykatat”, tha Rama duke theksuar se janë bërë konfiskime dhe sekuestrime.
Më pas u ndal edhe te gjyqtari Hazbi Balliu duke e quajtur të pacipë pasi vendosi që një pallat pa leje të konfiskuar t’ua kalojë ndërtuesve të paligjshëm.
