Për të folur në lidhje me punësimin në Shqipëri, në emisionin “Java në RTSH”, ishin të ftuara ekonomistja Era Farruku dhe agjentja e Real Estate Leila Lami.
Në panelin me analistët Preç Zogaj dhe Lorenc Vangjeli, ata u shprehën se të rinjtë shqiptarë interesohen për punë në restorante dhe hoteleri jashtë shtetit ndërsa brenda vendit kërkojnë dhe tentojnë punësimin në shtet dhe shumë pak në privat.
“Të jemi realist, ne japim mundësi, për 3-4 pozicione duke përshtatur CV që ju keni dhe më pas është zgjedhja e tyre nëse duan të qëndrojnë apo të ikin në kompani të tjera. Ajo që kemi ne shtesë është që jemi të qartë në atë që japim, paketat që ofrojmë janë shumë here më të mire dhe të rinjtë janë të fokusuar për të ikur jashtë”- u shpreh Leila Lami.
Ndër të tjera Lami tha se kompanitë që ata kanë, i sigurojnë kandidatit kontratë pune ku i ka të gjitha të përfshira, akomodimin, transportin dhe sigurimet e shëndetit, pra pagesa që marrin janë bruto për to.
Më tej, e pyetur për profesionet më të kërkuara, ekonomistja Farruku u shpreh se sektori i shërbimeve është më i kërkuari por së fundmi ka pasur shumë kërkesa edhe tek pjesa e IT.
“Unë do u thoja të gjithë të rinjve që arsimi I lartë të hap dyert po jo vetëm kjo, por edhe profesionet e lira. Duhet të jenë të thjeshtë e të jenë shumë praktik dhe të përshtaten me punën dhe atë që duan. Pra duhet të marrin atë që duan”- u shpreh ekonomistja Era Farruku në emisionin “Java në RTSH”.
