Këtë herë është Rough Guides që ‘zbulon’ disa gjëra për Shqipërinë. Lottie Gross shkruan se vendi i vogël i Ballkanit, jo gjithmonë merr atë që i takon.
Turistët, thotë ajo, shpesh preferojnë ishujt e famshëm të Greqisë, panoramat e Italisë apo romancën në Kroaci.
Sipas saj janë 7 gjëra që vizitorët e huaj duhet t’i dinë përpara sesa ta njohin nga afër.
Mund të keni një plazh të gjithin për vete
Mendoni për Shqipërinë, por nuk mendoni për plazhet. Në fakt, duhet të ndodhë e kundërta, sepse ky vend ka 476 km vijë bregdetare dhe një pjesë e tyre janë të paeksploruara.
Mund të hani ushqime të freskëta deti
Në Shqipëri, gatimi është i ndikuar nga disa kultura, si ajo otomane apo italiane. Por, prodhimet e detit janë të freskëta dhe në të gjitha qytetet bregdetare, mund të gjeni ushqime me çmime vërtet të favorshme.
Ngjisni alpet
Veriu i Shqipërisë mund të arrihet përmes liqenit të Komanit, ose me rrugë automobilistike, nga Kosova. Mos lini pa vizituar Valbonën, është një nga vendet më tërheqëse dhe me biodiversitet të lartë. Mund të bëni ngjitje, ecje. etj.
Eksploroni bunkerët
Shqipëria shpesh identifikohet me këto relike të komunizmit që janë ndërtuar gjatë periudhës 1944-1985.
Shikoni një kështjellë që ka jetë
Në Berat, brenda kështjellës, ka jetë. Nëse ngjiteni në lagjen Kala gjatë mbrëmjes, do t’ju duket sikur jeni kthyer pas në kohë, por nëse e vizitoni gjatë ditës, do të shikoni se ky qytet i vjetër ngjan me një labirinth.
Pini verë lokale
Dikur, shkrimtari i njohur romak, Pliny, e përshkruante vendin si destinacioni i tretë më i mirë për verën në Europë. Por, sot vera shqiptare nuk ka ndonjë reputacion të dallueshëm, ndoshta edhe për shkak të sasisë së lartë të alkoolit që përmban.
Blini antikuarë
Shumë afër kryeqytetit është Kruja, qytet i njohur për Pazarin e tij të famshëm ku mund të blihen prodhime artizanale e që më së shumti lidhen me figurën e Heroit Kombëtar Skënderbeut./monitor/a.k
