Francesco Totti zyrtarizoi një ditë më parë largimin nga Roma, ku akuzoi publikisht drejtuesit e klubit dhe presidentin James Pallotta për injorimin e tij në vendimmarrje dhe rolin e tij fiktiv si një drejtues i pavlerë në klub.
Në një konferencë për shtyp që thuajse zgjati rreth dy orë legjenda e Romas nxori vrer ndaj klubit, duke bërë që imazhi i Romas të jetë përtokë aktualisht, pas largimit të tij dhe të Daniele De Rossit.
Lajme të mëdha qarkulluan paraditen e së martës, ku theksonin se klubi roman po planifikonte të hidhte në gjyq Tottin, për të gjithë fjalët që ai tha kundër klubit dhe drejtuesit.
Në lidhje me këto lajme ka reaguar presidenti i Romas, James Pallotta, i cili theksoi: “Nuk ka shanse. 100% e pavërtetë. Në historinë e klubit tonë ky lajm merr medaljen e artë për komentin më idiot që kam lexuar.”
Kjo do të thotë se pavarësisht akuzave dhe fjalëve të rënda nga Totti, presidenti Pallota nuk ka ndërmend të marrë asnjë masë ndaj figurës emblematike, edhe për faktin se marrëdhënia e klubit me tifozët do të shkojnë në pikën zero.
/telesport
