Policia e Gramshit ka nisur procedimin penal në gjendje të lirë ndaj 39-vjeçarit E.M., pasi ai akuzohet se në mënyrë të përsëritur ka fyer në rrjetin social “Facebook” kryetaren e Bashkisë së Gramshit, Luljeta Dollani.
Pasi në mënyrë të përsëritur ka vazhduar me fyerjen në rrjetin social, kryetarja e bashkisë është detyruar ta denoncojë 39-vjeçarin në polici. Kjo e fundit e ka shoqëruar në komisariat të riun dhe më pas ka nisur procedimin penal në gjendje të lirë ndaj tij.
Edhe pse kryetarja nuk ka dashur që ta bëjë mediatike këtë fakt, ajo ka pohuar për “Panorama” se është zgjedhur nga qytetarët e saj për një qytet me mirëqenie, por duke qenë se rasti ishte i përsëritur, duke e fyer, ajo është detyruar që me këtë rast të merren organet kompetente.
Luljeta Dollani, kryetare e Bashkisë Gramsh, është përfaqësuese e Partisë Socialiste. Ajo shprehet se vijon të mbajë premtimet e mbajtura, duke kryer një sërë investimesh në Gramshin e lënë në harresë prej vitesh. Rasti në fjalë duket se e ka fyer kryetaren e bashkisë dhe e ka detyruar ta denoncojë, pasi siç shprehet ajo vetë
“Nuk mund të duroja fyerjet e një personi pa të drejtë në adresën time”. Edhe pse nuk pëlqen të komentojë shumë këtë rast, kryetarja e bashkisë pohon se raste të tilla nuk duhet të përsëriten. Dyshohet se sulmet verbale të 39-vjeçarit në adresë të kryetares së Bashkisë Gramsh mund të kenë lidhje me bindjet politike, ose me ndonjë problem personal të shtetasit E.M./panorama
c.a
