Partia Demokratike i kërkon Prokurorisë të veprojë me urgjencë dhe energjikisht për të liruar nga arrestimi i paligjshëm qytetarët në protestën e një dite më parë te Liqeni Artificial i Tiranës.
Sekretari i Përgjithshëm i PD-së, Arben Ristani, ka dalë në një deklaratë për mediat ku u shpreh se “Partia Demokratike do të kallëzojë penalisht Policinë e Shtetit, INUK, INUV, Inspektoriatin e Mjedisit dhe firmën Grand, të cilët, në shkelje të hapur të ligjit, kanë shperdoruar detyrën dhe kanë mundësuar veprën penale të ndërtimit pa leje e kryer në bashkepunim, parashikuar nga neni 199/a i Kodit Penal. Qindra qytetarë shqiptarë janë arrestuar e burgosur, vetëm se pse lyenin shtëpitë. Nga ana tjetër, Policia e Shtetit, INUK, INUV dhe Inspektoriati i Mjedisit, nuk bënë asnjë veprim për të marrë në mbrojtje një pasuri publike siç është Parku i Liqenit”.
“Protesta e organizuar nga Partia Demokratike ishte një protestë në mbrojtje të ligjit dhe ligjshmërisë së shkelur nga pushteti! Policia, INUK dhe INUV, autorë të qindra procedimeve penale “për ndërtim të paligjshëm”, nuk mund të arrestojnë dhe procedojnë qytetarët e Tiranës, për fajin e vetëm, pse mbrojtën ligjet dhe ligjshmërinë e shkelur me të dyja këmbët nga dhunuesit e ligjit. Partia Demokratike i kërkon Prokurorisë të veprojë me urgjencë dhe energjikisht për të liruar nga arrestimi i paligjshëm qytetarët”, tha Ristani.
