Sekretari i Përgjithshëm i PD, deputeti Arben Ristani ka hedhur akuza drejtuar Kryeministrit Ram, duke thënë se teksa Shqipëria përmbytet nga uji, shefi qeverisë bën jetën e tij luksoze dhe prej sheiku në Miami të SHBA-ve.
“Nderkohë që Shqipëria po përmbytet nga reshjet, Edi Rama po ngrohet në plazhet ultra-luksoze të Majamit. Ai vazhdon të rendë pas pasioneve të tij të cilat po i paguajnë qytetarët shqiptarë. Pas ekspozitave të pikturës nga njëri kontinent në tjetrin, Edi Rama ka nisur të frekuentojë ndeshje basketbolli në kampionatin më të shtrenjtë të botës, të NBA në SHBA. Mediat raportuan pak ditë më parë për pushimet e Edi Ramës në Majemi, ku ai u justifikua se kishte një gëzim familjar. Sot shqiptarët e morën vesh se gëzimi i kryeministrit ishte një ndeshje basketbolli në Majemi, në rreshtin e parë ku biletat kushtojnë miliona lekë. Ky është Edi Rama, kryeministri më i pacipë që ka pasur ndonjëherë ky vend. Ky është shteti i Edi Ramës, një popull në mjerim dhe një kryeministër që jeton si sheik.”- theksoi Ristani.
Ristani tha se në vitin që lamë pas, situata me rendin dhe sigurinë ka dështuar, një fakt që sipas tij pasqyrohet edhe nga bilanci i ditëve të para të këtij fillim viti.
“12 persona kane humbur jetën në vetëm 4 ditët e para të këtij vitit ndërsa kryeministri vazhdon të shijojë pushimet e tij luksoze në Majami. 100 mijë shqiptarë enden nëpër kampet e azilkërkuesve nëpër Europë sepse ju është hequr çdo mundësi të mbajnë familjet e tyre, ndërsa kryepërgjegjësi për këtë gjendje shijon ndeshjet e NBA. Qindra familje shqiptare janë pa energji dhe nëpër burgje se nuk paguajnë dot çmimin e rritur të energjisë, ndërsa Edi Rama e ka mendjen vetëm tek qejfi dhe rehatija e tij.
25 mijë familje vetëm në 3 muaj janë hequr nga skema e ndihmës ekonomike, e vetmja mundësi për të mbajtur familjet më bukë porEdi Rama harxhon miliona lekë për të parë një ndeshje basketbolli.”- shtoi ai.
