Goditja e bandës së Habilajve nga autoritetet italiane ka rikthyer edhe një herë në qendër të vëmendjes ish-shefin e antidrogës në Fier, Dritan Zagani. Ky i fundit ka akuzuar prej kohësh vëllezërit Habilaj për trafik droge e po ashtu ka përmendur publikisht përdorimin e makinës së ish-ministrit Saimir Tahiri nga këta persona.
Pas aksionit, ai u intervistua nga media italiane Meridionews, e cila publikoi e para dosjen e plotë të grupit Habilaj.
Ish-kreu i Antidrogës së Fierit shprehet për “Meridianews” se “Italia më ka bërë dhuratën më të bukur në botë”.
Zagani ndodhet në Zvicër ku ka fituar azil politik.
“Jam larguar nga Shqipëria e mbi 4 vjet jam nën akuzë pa u bërë kurrë një seancë gjyqësore kundër meje”.
Dritan Zagani tregon sesi zbuloi Habilajt që trafikonin drogë dhe armë drejt Italisë shkruan MeridioNews.
“Në vitin 2014 po hetoja një grup trafikantësh të lidhur me kushërinjtë Habilaj. Një grup shumë i fuqishëm që trafikonte kokainë dhe armë. Gjithashtu kisha përgatitur një informacion, por pastaj më futën në burg. Gjatë hetimit unë pashë edhe “Audi”-in e famshëm që më pas mësova se ishte i ministrit Saimir Tahiri. Vura re se ishte përdorur për të bërë udhëtime të dyshimta, por ankesat e mia nuk u dëgjuan” tha ai.
Sipas medieve italiane, Shqipëria mbetet kanali i privilegjuar i trafikut të marijuanës në Sicili. Ndërsa Zagani tregon sesi trafikohej droga nga Shqipëria në drejtim të Italisë.
“Deri më 2014, kisha shumë informacion mbi trafikun e drogës me kamion por dhe përmes detit. Gjatë kësaj periudhe u transferova, dhe nga shërbimet sekrete informohesha se droga trafikohej dhe me avionë të vegjël turizmi. 200-300 kg marijuanë në çdo udhëtim me avion mund të transportohej vetëm nëse kishe mbrojtje në nivel të lartë” tha ai.
Në fund ai është pyetur edhe për kërkesën e prokurorisë për arrestimin e Tahirit, ndërsa ka deklaruar se Kuvendi nuk do të votojë një gjë të tillë.
“Parlamenti shqiptar do të votojë kundër, pasi Tahiri është vetëm një hallkë e një zinxhiri të gjatë që nuk mund të prishet, pasi me të mund të rrëzohet dhe qeveria shqiptare” përfundoi ai./a.m.
