Drejtori ekzekutiv i Fondacionit Fundjavë Ndryshe, Arbër Hajdari, në një intervistë për Zërin e Amerikës ka folur për përpjekjet për të ndihmuar në rindërtimin e shtëpive të banorëve të prekur nga tërmeti i 26 nëntorit në Shqipëri. Zoti Hajdari është pjesë e komitetit të rindërtimit që ka krijuar qeveria e Shqipërisë pas tërmetit të 26 nëntorit dhe ndodhet në Nju Jork, ku po takohet me organizata të ndryshme të komunitetit shqiptaro-amerikan që po mbedhin fondi për të ndihmuar viktimat e tërmetit.
Zëri i Amerikës: Keni patur takime me organizata të kominitetit shqiptar në Nju Jork. A vazhdon të jetë i lartë interesimi për të ndihmuar?
Arbër Hajdari: Ka një numër të madh organizatash këtu në Amerikë që kanë grumbulluar fonde për tërmetin në Shqipëri, gjithashtu kanë grumbulluar ndihma të ndryshme materiale të cilat janë nisur drejt Shqipërisë. Gjatë këtyre ditëve kam pasur takime me shumë organizata ku jemi koordinuar, jemi unifikuar, në mënyrë që të bëjmë një punë sa më të mirë në Shqipëri.
Z.Hajdari, shumë donatorë ua besuan ndihmat për t’i shpërndarë në zonat e prekura, juve dhe organizatave të tjera. Si po procedohet?
Unë jam pjesë e Komitetit të Rindërtimit të realizuar nga qeveria shqiptare. I kam propozuar kryeministrit një projekt për të sjellë në Shqipëri shtëpitë e parafabrikuara. Ky ka qenë një projekt që ne e kemi diskutuar së bashku me arkitektë më herët se tërmeti, por tani erdhi koha e duhur për t’ia propozuar. Ky projekt është pritur mirë nga qeveria dhe nga organizata të ndryshme. Dhe ne jemi në një koordinim së bashku, kemi ndarë disa zona aty ku ne bëjmë projektet e banesave. Ne na është caktuar qarku i Tiranës. Javën që vjen nisim punën për të ndërtuar shtëpitë e reja të parafabrikuara.
