Rinas, ndalohet Besnik Coka; i dënuar për një vrasje në 1997
Policia e Shtetit ka arrestuar një 40-vjeçar të dënuar për një vrasje të ndodhur në vitin 1997. Në sajë të operacionit të koduar “Kurthi”, është vënë në pranga në aeroportin e Rinasit, Besnik Coka. Ai është dënuar nga gjykata e Dibrës me 25 vjet burg për vrasjen e një punonjësi të policisë, raporton Top Channel.
Në momentin e arrestimit, Coka ishte duke u larguar drejt Anglisë, teksa dispononte dokumente të rregullta angleze me emrin kosovar, Besnik Morina. Ai është prangosur nga efektivët e policisë në momentin e përpunimit të dokumentacionit në Rinas për të dalë jashtë shtetit.
Sipas burimeve zyrtare Coka është dënuar me 25 vjet burg në akuzën e vrasjes me paramendim. Ngjarja ka ndodhur më 25 gusht të 1997, ku në bashkëpunim me B. L dhe Z. L, kanë vrarë me armë zjarri punonjësin e policisë, Miftar Krrashi, në fshatin Arras.
