Ish Ministri i Jashtëm i Kosovës, Petrit Selimi, i ftuar në emisionin “Të Paekspozuarit” në MCN TV, ka folur për rikthimin e Trump në Presidencë në SHBA dhe domethënien e kësaj ngjarje për Kosovën.
Ai deklaroi se qeveria Kurti ka shkatërruar marrëdhëniet me SHBA, ndërkohë që deklaroi se ideja e shkëmbimit të territoreve me Serbinë ka vdekur.
“Në pamje të parë, Kosova ka qenë një produkt i një konsensusi të një establishmenti të qendrës, i cili si Demokratët ashtu edhe Republikanët kishin vizion për ta çliruar dhe për t’u shpallur pavarësia, ka qenë konsensus ndërpartiak. Ai konsensus i qendrës nuk ekziston më. Ardhja e Trump nuk mund të shihet me prizmin e botëkuptimeve që kemi patur më herë.
Prej viteve 90’ pavarësisht partive politike, kishin dashamirësi në ngritjen dhe ruajtjen e marrëdhënieve me qeverinë amerikane. Me ardhjen e kryeministrit Kurti ndodhi shkatërrim i marrëdhënieve, sidomos me aktorë si Grenell, pati akuza publike nga zoti Kurti, në gazetat majtiste, që ishte organizuar grusht shteti ndaj Kurtit.
Kemi dy diskontinuitete, e para në Kosovë dhe e dyta në SHBA. Kosova kurrë në historinë e vet, nuk ka patur punët më keq me Amerikën se tani. Kryeministri nuk i ka patur dyert e hapura.
Nuk do ta quaja Grenell më afër interesave të Serbisë, por po flasim për një politikë më transaksionale. Pyetja është jo se kush ka të drejtë morale, apo historike, por si do të përfitojë Amerika prej kësaj pune, prandaj edhe politika jonë e jashtme duhet të fokusohet se si ë gjejmë një balancë.
Disa vegla që kemi patur, nga armatimet deri te investimet, duhet ti integrojmë në qasje proaktive. Ka qenë tragjike që Kurti anulloi gazpërçuesin amerikan, një grant për ndërtimin e gazpërçuesit, për gaz amerikan. Kurti e anulloi. Këtë projekt e promovoi shumë Grenell. Duhet të jemi të mençur se si të gjejmë gjuhën e përbashkët”, tha ndër të tjera Selimi.
