Rikthehet në Tiranë konkursi kombëtar i teknologjisë, BiblioTech, për fëmijë dhe të rinj për t’i inkurajuar ata të zhvillojnë ide teknologjike dhe inovative si dhe t’i përgatisë ata për vendin e punës të së ardhmes duke rritur aftësitë e tyre digjitale dhe të sigurisë në internet.
Nga datat 6-7 dhe 8 maj në Parkun Olimpik, falë edhe mbështetjes së Bashkisë së Tiranës, fëmijë të moshave 8-18 vjeç do të kenë mundësinë që të zhvillojnë koncepte teknologjike dhe inovative përmes argëtimit, mësimit me metoda tërheqëse dhe interesante dhe nëpërmjet prezantimeve.
Aplikantët do të marrin përvoja mbi orientimin dhe zgjidhjen e problemeve përmes një programi tre ditor të drejtuar nga mentorë, duke ndihmuar dhe inkurajuar fëmijët dhe të rinjtë të sjellin në jetë idetë e tyre.
Në këto tri ditë frymëzuese, fëmijët dhe të rinjtë do të nxisin dhe udhëheqin konceptualizimin e ideve teknologjike. Ata do të angazhohen në përvoja teknologjike, ndërtimin e besimit, rritjen e njohurive të tyre dhe zhvillimin e aftësive dhe shprehive të të mësuarit.
Qëllimi i kësaj sfide është rritja dhe zgjerimi i interesit të fëmijëve dhe të rinjve për teknologjinë, inovacionin, modelimin e qendrave sociale, të mirat digjitale dhe mbrojtjen online, ndërsa do të mësojnë nga njëri-tjetri të zgjidhin problemet në ekip.
Çmimet: Sfida do të ketë 3 fituesit e parë për grupmoshat e mëposhtme:
1. Vendi i parë për inovatorët 8-11 vjeç
2. Vendi i parë për inovatorët 11-15 vjeç
3. Vendi i parë për inovatorët 15-18 vjeç
Teknologjia, e cila po zë vend gjithnjë e më shumë te gjenerata e të rinjve, është sot në qendër të zhvillimit të hapësirave publike në kryeqytet, veçanërisht bibliotekave, të cilat po transformohen gjithnjë e më shumë në funksion të teknologjisë.
/a.r
