Pas më shumë se një muaj mungesë, rikthehen në Kukës reshjet e shiut. Reshjet me intensitet të larte nisin këtë mesditë, por deri me tani nuk raportohet për problematika në rrugë që në kohë me reshje janë në trysninë e rënies së dherave dhe gurëve.
Si pasojë e reshjeve në Gjinaj të Hasit një automjet ka dalë nga rruga, por fatmirësisht pa pasoja.
Reshjet pritet të ndikojnë në përmirësimin e situatës hidrike në kaskadën e Drinit, pasi për shkak të mungesës së reshjeve të shiut dhe dëborës ka patur rënie të nivelit të ujit në Fierzë, ujëmbledhësi më i madh në vend nga ku varet edhe prodhimi i energjisë elektrike.
Aktualisht niveli i ujit në liqenin e Fierzës është 266 metra mbi nivelin e detit dhe prurjet nga dy lumenjtë kryesorë Drini i Bardhë dhe Drini i Zi janë të pakta deri në 80 metër kub në sekondë.
Heci i Fierzës gjatë kësaj periudhe pa reshje ka punuar me turbina te alternuara për ruajtjen e rezervës ujore, por edhe nga importi i energjisë elektrike. Aktualisht Fireza punon me tre turbina nga katër që ka gjithsej.
