Komedia “Budallenjtë”, e Neil Simon do të shfaqet sot në Teatrin Kombëtar të Kosovës.
Në këtë komedi të vënë në skenë nga regjisori Florent Mehmeti, ass.regjisore Arzana Kraja, skenografia Petrit Bakalli, kostumografia Rudina Xhaferi, muzika: Ard Islami interpretojnë Shkëlzen Veseli, Adrian Morina, Ilire Vinca, Arta Selimi, Ylber Bardhi, Ramadan Malaj, Xhejlane Godanci, May-Linda Kosumovic, Semira Latifi, Albulena Kryeziu,
Mallkimet e “Budallenjve” janë mallkimet që çdo ditë i kemi shumë afër mbi e rreth e përqark vetes. Mallkime që krijohen konvencionalisht dhe falë besimit e vet-deprimimit tonë ato shndërrohen në të vërteta shpesh të përjetshme.
Komedia rrëfen historinë e një mësuesi të ri në misionin e tij për ta edukuar popullsinë e një vendi të vogël e provincial, duke iu prishur mallkimin që i mban ata si “budallenj”.
Personazhet në shfaqje paraqiten të pashkolluar dhe besojnë se janë të mallkuar dhe e bindin veten se realiteti është i tillë e nuk ka tjetër.
Shfaqja, veçanërisht në fund prek fort sidomos skenën politike në vend, duke iu drejtuar saktësisht atyre që punojnë në qeveri, kryetarëve të komunave e të tjerë faktorëve të rëndësishëm. Komedia “Budallenjtë” u shfaq premierë në Teatrin Kombëtar të Kosovës në muajin janar.
