Teksa maturantët po presin me ankth që Ministria e Arsimit të publikojë formularin e aplikimit në institucionet e arsimit të lartë, ky institucion vendos t’u rijapë një shans atyre që ende s’janë regjistruar për t’u futur në garë.
Bëhet fjalë për maturantët e viteve të kaluara që, për arsye nga më të ndryshmet nuk kanë arritur dot të aplikojnë për të vijuar studimet e larta, të cilët mund të aplikojnë në tri ditët në vijim.
“Portali i Maturës Shtetërore do të hapet në periudhën 13-15 korrik 2016, nga ora 08:00 deri në 16:00. Ky është afati i fundit që u vihet në dispozicion maturantëve të viteve të kaluara për plotësimin e formularit A1Z”, sqarohet në njoftimin e publikuar në faqen e Agjencisë Kombëtare të Provimeve.
Kushti i vetëm është që ata të rezultojnë kalues në provimet me detyrim dhe me zgjedhje.
Ajo çfarë duhet të bëjnë ata që i përkasin kësaj kategorie, është të paraqiten në shkollat ku kanë kryer arsimin e mesëm të lartë ose në drejtorinë arsimore, nëse shkolla ku kanë kryer studimet është mbyllur.
Sipas njoftimit të AKP-së, ata duhet të kenë me vete katër dokumente: kartë identiteti ose pasaportë biometrike; diplomë të Maturës Shtetërore ose një fotokopje të panoterizuar të saj; certifikatë të notave të Maturës Shtetërore dhe fotokopje të panoterizuar, si dhe vërtetim të notave të Maturës Shtetërore të marra në drejtorinë ose zyrën arsimore përkatëse.
Njësoj si Formulari A1, edhe procesi i plotësimit A1Z për tri ditët në vijim, 13, 14 dhe 15 korrik, kryhet në rrugë elektronike dhe ndiqet nga një person që ngarkon drejtoria e shkollës, që quhet mbikëqyrës.
Janë këta të fundit që, pasi të kenë marrë kontaktet e kandidatit, në një fazë të dytë duhet ta njoftojnë atë për të bërë verifikimin e të dhënave shkollore të të gjitha viteve të shkollimit.
“Fotokopjet e dokumenteve të mësipërme: diploma, certifikata dhe vërtetimi i notave të Maturës Shtetërore lihen në shkollë dhe nga data 18.07.2016 maturanti/kandidati duhet të paraqitet përsëri në shkollë për t’u interesuar për hedhjen në sistem të notave të të gjitha viteve të arsimit të mesëm”, sqarohet në njoftimin e AKP-së.
Formularin A1Z e plotësojnë mbetësit në një nga provimet e maturës së viteve të kaluara, ata që kanë përfunduar arsimin e mesëm jashtë vendit apo ata që, për arsye personale, nuk kanë mundur të aplikojnë me Formularin A1Z.
Panorama/d.i.
