Deputeti i PS, Ervin Bushati, ka deklaruar se projektrezoluta e mazhorancës për të parandaluar rastet e financimeve të huaja në skenën politike do të garantojë një proces zgjedhor të rregullt dhe do ndërpresë çdo fond të pajustifikuar për mediet dhe partitë.
“Për të garantuar një proces sa më të pastër zgjedhor, në funksion të publikut, për të ndërprerë çdo fond të pajustifikuar në financim të medieve dhe partive, ne menduam të merrnim disa masa. Është detyra jonë për t’i paraprirë këtyre mënyrave se si mund të ndikohet në demokraci, në politikë, në informimin publik”, – tha Bushati.
Financimi i disa donatorëve rusë dhe firmave fantazmë në partitë politike shqiptare, sipas Bushatit, ka sjellë nevojën e hartimit të kësaj rezolute.
“Kemi një investigim dhe çështje të hapur në prokurori për financimin e disa donatorëve të firmave fantazmë që çojë deri te disa oligarkë rusë me PD dhe është akoma për t’u provuar. Ka raste kur portale në Shqipëri mund të jenë të financuara nga burime të dyshimta. Në mënyrë të përsëritur kam ngritur shqetësimin se financimet ruse në politikën shqiptare përbëjnë rrezik për demokracinë shqiptare. Ne kemi indicie dhe fakte që janë në prokurori, që kanë ndërhyrë në mënyrë të pandërgjegjshme nuk e di, se Basha ndoshta nuk e ka ditur që financojnë rusët, ndoshta nuk e ka ditur se Basha nuk di shumë gjëra, ashtu i përgjumur si është, ndoshta dhe i ka shpëtuar”, – tha Bushati.
/a.r
