Kryeministri Edi Rama ka reaguar pas vendimit të Kuvendit për të rrëzuar projektrezolutën e propozuar nga Sali Berisha ku dënohej genocidi serb në Srebrenicë.
Kreu i qeverisë thotë se ata që “hidhen përpjetë për gjoja dështimin” e saj duhet të mësojnë që “ajo s’ishte rezolutë, por lojë e ulët”.
“Ata që hidhen përpjetë për gjoja dështimin e një rezolute mbi Srebrenicën në parlamentin shqiptar, si fillim duhet të pyesin po ç’ne kjo rezolutë sot, pse, me ç’rast? Pastaj duhet të informohen mbi tekstin në fjalë dhe në fund duhet ta mësojnë se ajo s’ishte rezolutë po lojë e ulët”, thotë Rama.
Sipas kreut të qeverisë, kjo është lojë e ulët Sali Berishës, që sipas Ramës është i shpallur “non grata” nga SHBA dhe “njihet botërisht edhe si thyerësi i embargos ndaj Sllobodan Millosheviçit“.
“Lojë e ulët e një të shpalluri nga SHBA si i korruptuar dhe minues i demokracisë, që njihet botërisht edhe si thyerësi i embargos ndaj Sllobodan Millosheviçit dhe që kapet deri edhe pas kockave të viktimave të kasapit të Beogradit, për t’u ringjallur nga varri i tij politik!
Keqardhje për ata që pa e pasur idenë fare të kësaj loje të ulët, ndjehen gabimisht të lënduar dhe neveri për ata që i shkojnë pas avazit të një të damkosuri si katran me bojë, po Srebrenica nuk mund të jetë letër për bojën e katranit të Shqipërisë”, shkruan Rama.
Partia Demokratike i kërkoi Kuvendit miratimin e një projektrezolute ku të dënohej genocidi serb 27 vjet pas masakrës më të madhe të ndodhur në 3 dekadat e fundit, asaj të Srebrenicës ku mbetën të vrarë 8000 boshnjakë.
Kërkesa u rrëzua me votat e shumicës socialiste. Iniciator i kësaj nisme ishte Sali Berisha i cili argumentoi se me këtë votim në Parlament jo vetëm dënohet barbaria ndaj boshnjakëve, por i jepet një mesazh i qartë lidershipit aktual në Beograd, që sipas tij është bashkëfajtor dhe bashkëideator i kësaj masakre.
Por Partia Socialiste konfirmoi se ka marrë vendim të mos miratojë asnjë kërkesë apo propozim që vjen nga një i shpallur non-grata nga SHBA.
/a.r
