6 deputetët e Partisë Demokratike që u përjashtuan nga seanca parlamentare kanë ankimuar vendimin e Sekretariatit të Etikës.
Në një kërkesë zyrtare drejtuar Byrosë së Kuvendit, ata thonë se ky vendim është anti-kushtetues dhe një akt i rëndë ndaj parlamentarizmit në Shqipëri.
Në shkresë thuhet po ashtu se vendimi për përjashtimin e deputetëve është marrë me datë 21 Shkurt, ndërkohë që seanca u zhvillua më datë 16 Shkurt, gjë që sipas tyre është e qëllimshme.
“Kjo bëhet për qëllimin e vetëm që të pengohen deputetët nga pjesëmarrja në më shumë se një seancë parlamentare dhe në komisione”, shkruhet në letër.
Në fund të shkresës, kërkohet shfuqizimi i menjëhershëm i këtij vendimi, të cilin e cilësojnë anti-ligjor.
Ankimimi mban firmën e 6 deputetëve të përjashtuar: Edmond Spaho, Elda Hoti, Sorina Koti, Oerd Bylykbashi, Lindita Metaliaj dhe Greta Bardeli.
Përplasja me Gardën dhe ankimimi i vendimeve të Kuvendit vijon për të tretën herë që PD dhe PL kanë protestuar para Parlamentit.
/a.r
