Revolucioni ka nisur. Është Luka Jovic goditja e parë e Real Madrid në misionin e klubit “los blancos” për të ndërtuar një tjetër skuadër kompetitive, pas një sezoni zhgënjyes në La Liga dhe Europë. Pritet zyrtarizimi, por mediat spanjolle janë të sigurta se sulmuesi serb do të vendoset në urdhërat e Zinedine Zidane duke nisur nga sezoni i ardhshëm.
Palët kanë arritur marrëveshjen, ndërsa për kartonin e Jovic, Reali Madridit do të paguajë te Eintracht Frankfurt 60 milion euro. Ishte pikërisht kjo shifër, që shbllokoi tratativat dhe i lejoi madrilenëve të parakalojnë rivalët e përjetshëm të Barcelonës, që gjithashtu ndiqte prej kohësh sulmuesin. Jovic është vetëm i pari, ndërsa rinovimi i skuadrës do t’i kushtojë Florentino Perez 540 milion euro.
Pjesa më e madhe e kësaj shifre do të shkojë për Paul Pogba, i cili pritet të transferohet në La Liga për 150 milion euro. Futbollisti i dytë më i paguar do të jetë Eden Hazard. Belgu kërkohet gjithashtu me ngulm nga Zidane dhe për ta liruar atë nga Chelsea duhen 112 milion euro.
Lista e blerjeve për Real Madrid në merkaton e verës vijon me Kristian Eriksen, i vlerësuar 85 milion euro.
Dy përforcimet e tjera që pritet të bashkohen me skuadrën madrilene duke nisur nga sezoni I ardhshëm janë Ndombele dhe Militao. Kartoni i mesfushorit francez të Lion kushton 80 milion euro, ndërsa ai i mbrojtësit brazilian të Portos 50 milion euro.
